Home » Booshi Wever: APESAR CU NOS POR TA CONVIVI CU E SITUACION NA VENEZUELA, NOS MESTER TA CAUTELOSO PA NO IMPORTA AWOR PROBLEMA POLITICO!

Booshi Wever: APESAR CU NOS POR TA CONVIVI CU E SITUACION NA VENEZUELA, NOS MESTER TA CAUTELOSO PA NO IMPORTA AWOR PROBLEMA POLITICO!

by Admin
0 comment 58 views

 

 

Cu nos ta un pueblo tolerante nos sa. Democracia ta un bien cu nos tin cuida y promove. Nos turismo ta e unico pilar importante cu nos tin na e momentonan aki y nos sa cu e ta vulnerabel. 

Pueblo di Aruba, cu su reservanan a permiti hendenan di otro parti establece nan mes, na momento cu nos tabata mester di nan y tambe na momento cu nan tabata busca un mihor porvenir mirando e situacion den nan pais.

 

Loke si ta dificil pa caba di comprende ta con despues cu Aruba a habri porta, awor un grupo cu ta estableci aki ta haya ta bon pa no solamente organisa un demostracion contra gobierno Venezolano pero pa colmo den nos area TURISTICO. Esaki a wordo haci na grandi pa medio di invitacion (mira potret). Kico ta pasa si bin confrontacion? Ki daño esaki lo por causa? Nos autoridadnan ta na altura di esaki? Manera nos a bisa caba, ta trata aki di e unico pilar economico drechi cu nos tin ainda, na unda cu segun AHATA un 7000 persona ilegal ta trahando, ta core riesgo di mata e galiña cu ta pone webo di oro.

Cu UPP no tin representacion den Parlamento, no ta stroba cu nos tin di pone atencion riba e desaroyo aki. Nos no a tende ningun gremio, ni comercial ni sindical ainda reacciona. Nos no a tende ningun politico, representante di pueblo den Parlamento, un Parlamento cu tin e pretencion di ta critico, mucho menos ministernan reacciona.

 

Respetando e derecho di demostracion, mi ta haya esaki un falta di respet pa e tolerancia y convivencia cu nos pueblo a bin ta mustra na e inmigrantenan aki. Nos mester ta realistico cu nos grandura ta haci nos vulnerabel tambe, y cu e consecuencianan por ta mas grandi compara cu un demostracion na Miami, New York, Paris of Madrid!!!!

 

UPP ta urgi na nos gobernantenan, particularmente nos Prome Minister, cu ta encarga cu orden publico, seguridad nacional y cu asuntonan di relacion externo, mescos tambe e minister di Husticia, pa duna claridad necesario si nan ta na altura y a duna permiso pa tal demostracion.

Nos a bin ta mira caba con den e gobernacion anterior berde (AVPOR), nada a wordo haci pa stroba importacion di problemanan social di otro paisnan. Awor bou di e gobierno actual (POREDmep) esaki a bira mas peor ainda, ora cu minister di Husticia, secunda pa e coalision den Parlamento, a kita porta, bentana y kozijn riba tereno di admision. Awor nos gobierno parce di ta importando tambe, aparte di problemanan social, problema politico riba nos pais, cu nan actitud super tolerante y liberal. Mi tin comprendi tambe, cu despues cu a haci un show di bay papia cu UNCHR na New York, e dunamento di supuesto asilo politico ta mas cu nunca. Ta ken cu ta y pa ki cu ta duna asilo politico, siendo mas bien ta pa razonnan economico hopi a y ta Sali for di nan pais.

 

Un biaha mas, UPP ta respeta e derecho pa un grupo por demostra, pero e grupo mester laga sano huicio prevalece y tene consideracion cu no sin mas por hinca un pais chikito asina manera Aruba den problema politico y consecuentemente den problema economico, ora cu afecta nos industria turistico. Gobierno mester actua den esaki ya cu no ta permisibel pa algo asina tuma lugar den un area turistico y pa colmo den oranan di anochi cu turistanan ta sali pa bay come. Simplemente inaceptabel.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio