Home Politics Marisol Lopez-Tromp: Situacion di Venezuela a haya hopi atencion den reunion di...

Marisol Lopez-Tromp: Situacion di Venezuela a haya hopi atencion den reunion di IPKO

 

 

Siman pasa lider di fraccion di POR den Parlamento, Marisol Lopez-Tromp tabata parti di e delegacion di Aruba presente na e reunionnan di IPKO, e encuentro interparlamentario di Reino Hulandes, cu a tuma lugar na Sint Maarten.

A atende varios punto di interes pa e partnernan den Reino, manera entre otro e metanan di desaroyo sostenibel, Statuut, relacionnan den Reino, problemanan y posibel solucionnan, geschillenregeling, pero sigur e punto na e momentonan aki mas importante pa nos tabata e situacion di Venezuela.

Lopez-Tromp a indica cu e delegacionnan a intercambia di opinion na un manera intensivo riba e situacion di migrantenan legal y ilegal for di Venezuela cu ta yegando e partinan di Caribe Hulandes, specialmente nos islanan di Aruba y Corsow. E situacion aki ta uno preocupante y a haya e atencion necesario durante e reunion na Sint Maarten.

E delegacionnan ta di acuerdo cu e situacion aki ta uno preocupante y tin e atencion di e parlamentarionan den cada un di e paisnan di Reino Hulandes, specialmente mirando e consecuencianan grave cu esaki tin pa loke ta e sectornan social, financiero y otronan pa e comunidadnan. Esaki sin menciona e imagen internacional di e islanan pa loke ta e situacion aki.

E preocupacion mas grandi pa e participantenan di IPKO den e situacion aki di migrantenan Venezolano ta cu ta di gran importancia pa e gobiernonan di e cuatro paisnan di Reino sigui busca conhuntamente posibel solucionnan  specialmente pa Aruba y Corsow.

Marisol Lopez-Tromp a splica cu den e palabracionnan haci entre e participantenan di IPKO a keda indica cu pa logra cu e representantenan di pueblo por realisa nan tarea di control na un bon manera, cu nan lo informa otro mas frecuente riba e situacion actual di nan pais, riba e posibel solucionnan cu ta wordo palabra of riba peticionnan concreto di ayudo y sosten di nan gobiernonan. Tambe e delegacionnan a indica cu nan lo desea di tin mas datonan posibel riba e diferente aspectonan pa atende e situacion aki. A base di e intercambio di informacion y datonan concreto aki, e parlamentarionan lo realisa nan respectivo gobiernonan diferente pregunta riba e maneho cu ta of lo wordo hiba.

E parlamentaria di POR ta indica cu e ultimo punto aki ta hopi importante teniendo na cuenta e peticion di tanto Aruba como Corsow pa medio di Reino, pa forma parti di e programa di Union Europeo cu ta sostene e paisnan na Sur America cu ta wordo confronta cu un cantidad di migrantenan y refugiadonan Venezolano, manera ya caba a wordo palabra door di Aruba y Corsow den cuadro di Eurolat. Esaki ta conta tambe pa otro posibel programanan internacional cu tin e mesun intencion cu esun di Union Europeo.

Finalisando, Marisol Lopez-Tromp a indica cu lo sigui atende cu e situacion di crisis di Venezuela internamente y tambe den cuadro parlamentari y e lo bira un di e puntonan di importancia den e siguiente reunion di IPKO.