Home Local AHATA:  Aña 2018 a cera cu bon resultado den turismo

AHATA:  Aña 2018 a cera cu bon resultado den turismo

SHARE

ORANJESTAD, 11 di januari 2019: Aruba Hotel & Tourism Association (AHATA) a publica cifranan di ocupacion y prijs di hotelnan pa luna di December y averahe di aña 2018. Na December e porcentahe averahe di ocupacion di hotel (Occupancy Rate) tabata 82%, un caida di 2.3 punto compara cu December di e aña prome. Di otro banda e balor di camber ta sigui ta mas halto cu aña pasa: ADR (Average Daily Rate – e prijs averahe pa cada camber bendi) a subi cu 10.4% compara cu December 2017 pa yega $350.67. RevPAR (e entrada averahe pa tur camber disponibel) tabata $287.64 na December 2018, un aumento di 7.4% compara cu un aña pasa. Por nota cu High Season a cuminsa e weekend prome cu Pasco, locual ta trece prijs averahe mas halto den December compara cu e lunanan anterior.   

 

Hotelnan di Aruba a cera 2018 cu bon resultado, aunke cu ocupacion a baha un tiki. Ocupacion na 2017 tabata 85.4% y pa aña 2018 a baha na 84.6%. Demanda ta mustra halto ainda pa Aruba, cu hopi hotel den region Caribe cera despues di horcannan di September 2017.  Na Aruba pa tal motibo a logra un crecemento di 10.3% den RevPar den 2018 pa un averahe di $227.16.

 

Tisa LaSorte, CEO di AHATA, a splica cu e prome lunanan di 2019 tambe ta mustra positivo. Tin un tiki preocupacion pa e luna di April pa motibo cu Pasco Grandi ta mas laat den luna y tin preocupacion pa ultimo mita di 2019 considerando cu mayoria di e hotelnan den region lo a  habri bek cu cambernan renoba y cu mercadeo agresivo. Ta importante pa Aruba sigui mercadea efectivamente y pa nos isla por mantene un bon demanda como destinacion.

 

E cifranan ta basa riba 16 hotel: Amsterdam Manor Beach Resort, Barcelo Aruba, Boardwalk Hotel, Brickell Bay Beach Club, Bucuti & Tara Beach Resort, Divi & Tamarijn All-Inclusive, Eagle Aruba Resort (anteriormente Tropicana), Hyatt Regency Aruba, Manchebo Beach Resort, Marriott Aruba & Stellaris Casino, The Mill Resort, Renaissance Aruba Resort, The Ritz-Carlton, RIU Palace, RIU Antillas y Talk of the Town Hotel.