Home » Segun Melvin Tromp di AVP: E hende ta central, pero gabinete Wever Croes ta castiga pensionadonan cu ta purba sobrebibi

Segun Melvin Tromp di AVP: E hende ta central, pero gabinete Wever Croes ta castiga pensionadonan cu ta purba sobrebibi

by Admin
0 comment 51 views

Otro traction di votadonan, otro decepcion grandi di un grupo di pensionadonan kendenan  wordo engaña barbaramente, ta loke gabinete Wever Croes ta sembando den comunidad, contra un pueblo cu nan a pidi confiansa mientras cu nan mes no tabata di confia.

Melvin Tromp di Partido AVP ta mustra cu for di campaña electoral caba prome minister Evelyne Wever Croes y su partido a haci promesanan concreto na pueblo cu ora cu e drenta gobierno, e hende ta central, e hende ta bin na prome luga.

“Loke ya tur hende sa caba, ta cu Aruba tin un prome minister cu no ta respeta su propio palabranan y tur promesa haci na pueblo, a bay perdi ora cu el a fomra e gobierno di mas sin gevoel cu nos pais a yega di conoce.

No ta nada straño di partido MEP ya cu den pasado caba e ex lider Nel Oduber a yega di declara cu campaña ta un cos y goberna ta otro cos pero un caminda a spera cu Evelyne lo tin mas respet pa su pueblo, na luga di basha un serio di medida sin misericordia contra e mesun pueblo aki.

E ultimo berdad amargo ta e hecho c’un grupo di pensionado ta bay perde nan ‘reparatietoeslag’ cu gobierno di AVP a percura pa nan ricibi y e argumentonan cu ta wordo menciona, ta simplemente inhumano y simplemente cruel.

Na momento cu gabinete Wever Croes introduci aumento di BBO y BAZV el a mishi cu cartera di e hendenan aki, hincando nan den un situacion financiero asina delicado cu su persona hunto cu famia y amigonan, no kier compronde of realisa,

Bida a bira hopi mas caro, productonan di prome necesidad a conoce aumentonan sin igual y e placa pa tur hende a bira menos, no solamente pa pensionadonan pero pa tur hende di poco recurso, di poco entrada.

Ora cu nos tuma nota cu e grupo di pensionadonan cu ta bay perde na reparatietoeslag si nan itn un entrada extra hunto cu nan pensioen cu nan ta ricibi, ta un tipo di atraco legal cu gobierno di Evelyne Wever Croes ta cometiendo.

E solo hecho cu tin pensionadonan tin cu busca un otro forma pa haya un entrada extra pa sobrebibi, ta resultado directo di medidanan cu a wordo tuma riba lomba di pueblo pero ta algo cu e prome minister no por compronde, ya cu su famia y su amigonan, ta bibando bon, ta gosando di tur beneficio cu awor y semper partido MEP a percura pa nan tin.

Segun e informenan ricibi ta mustra cu ora un pensionado sobrepasa e suma di 1134 florin pa luna, e ta perde su reparatietoeslag pero ta mesun partido aki durente di campaña electoral pa medio di e actual minister di asuntonan social, Glenbert Croes, a insisti cu e ‘bestandsminimum pa un cas di famia awendia, ta di 4200 florin, cual a wordo confirma tambe pa otro minister di e gobierno aki, esta Andin Bikker.

Pues ya caba e suma di 1134 cu pensionadonan tin cu biba cune segun gabinete Wever Croes, no ta yega pa cubri gastonan di cas y ora cu e hendenan grandi aki, hendenan cu pa gran parti di nan bida a traha pa construi y crea e pais cu nos tin awe, nan ta wordo castiga pa un gobierno cu no tin misericordia cu ningun hende cu entrada abou.

Prome minister Evelyne no ta compronde e dolor di e hendenan aki, e no tin nocion mes di kico ta biba c’un entrada asina abou pero si ta tuma medida cu ta practicamente haci imposibel pa e hendenan di menos entrada, por biba den tur trankilidad.

Pa colmo ta mesun prome minister aki cu su partido a sigura pueblo durante di campaña cu e lo reduci prijs di awa y coriente, pero al contrario esaki nunca baha y lo bay aumenta den proxim lunanan nos dilanti.

Ta mesun gobierno aki a priminti di busca gasolin mas barata, cu nan lo aumenta salario minimo pa tur hende, cu nan lo percura pa e hende ta central y ora cu e hendenan aki busca alternativa pa trata di sobrebibi tur luna, gobierno di Evelyne Wever Croes ta para cla pa ranca esaki tambe for di nan,

Tur loke nos por bisa ta cu prome minister su vision di gobernacion ta di castiga pueblo, ranca mas placa cu por for di pueblo pero percurando pa famia y amigonan, ta biba bon, ta gosa di su gobierno cu no tin interes di pueblo na pecho,” miembro di AVP, Melvin Tromp a declara.

 

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio