Gabinete Wever-Croes a declara aña 2019 como Aña di Famia y Cuido di nos Muchanan. Den cuadro di esaki, diaranson atardi, Prome Minister Evelyn Wever-Croes tawata tin e grato honor di a ricibi e hoben cantante Jaydiene Croes den sala di Conseho di Minister.
Jaydiene Croes durante fin di aña a canta un bunita cancion titula Pueblo di Amor componi pa señor Danilo Vrolijk. E letranan di e cancion ta cuadra cu e pensamento di Gobierno pa loke ta trata e Aña di Famia y Cuido di nos Muchanan. Jaydiene ta canta e cantica aki cu un sentimento hopi profundo manera e letranan di e cancion ta tambe, reflehando riba nos pueblo di amor cu nos tur ta desea pa Aruba bira. Sin odio, sin rencor. Pero uni den oracion y amor teniendo man di bo ruman y hunto comberti Aruba den un Pueblo di Amor. Esaki ta loke cu Gobierno di Aruba kier logra den aña 2019, cu ta Aña di Famia y Cuido di nos Muchanan.
Prome Minister Evelyn Wever-Croes hunto cu Minister Glenbert Croes, den precencia di famianan, a entrega Jaydiene y señor Vrolijk un reconocimento di aprecio y gradicimento pa nan talento di compone palabranan asina bunita cu ta refleha union di nos pueblo y expresa e letranan aki cu hopi amor y sentimento den un bos asina bunita.
E deseo ta cu e cancion aki por toca nos pueblo especialmente nos hobennan. Gobierno di Aruba, den e Aña di Famia y Cuido di nos Muchanan, ta desea, pa cada un di nos, den nos constelacion familiar, irespecto si ta mama cu yiu; mama, tata y yiu; wela of welo cu yiu; tanta cu yiu; tur famia na Aruba, forma un ekipo, un union pa yuda tur nos muchanan y nos hobennan pa nan bira exitoso den bida. E famia ta esun prome cu mester proteha nos muchanan, duna nan amor y yudanan pa nan ta exitoso den bida.
Prome Minister a haci un peticion pa e cancion aki, Pueblo di Amor, wordo traha den un ‘jingle’ pa asina e wordo uza den tur actividad cu lo bay wordo teni durante e Aña di Famia y Cuido di nos Muchanan.