Parlamentario pa fraccion di AVP, sr Mike de Meza a mustra cu Aruba tin un prome minister cu ta duna e impresion cu e tin dos caracter, dos personalidad y cu su persona mes no sa cua ta esun autentico cu e mes tin cu kere.
“Nos por a scucha pa nos sorpresa, declaracion di prome minister Evelyne Wever Croes mustra cu e situacion actual caminda prijs di productonan, principalmente esunnan di prome necesidad, no mester aumenta di prijs, ya cu su gobierno no a haci algo cu ta hustifica e medida aki.
Aki ta caminda nos ta kere e problema di prome minister Wever Croes ta sinta, ya cu ta bo gobierno, cu firma di bo persona como prome minister, a dicidi di aumenta for di prome di juli 2018, BBO y BAZV, creando un situacion asina delicado cu den ultimo trimester di 2018, Banco Central practicamente a confirma cu nos pais a drenta un recesion.
Ningun otro hende, ningun otro gobierno, ta gobierno di Evelyne Wever Croes ta causando di e desaster aki, caminda e aumento di BBO ta pasa den diferente schakel afectando prijs di tur producto aki na Aruba, hincando hopi famia den problemanan financiero hopi grandi.
Riba dje dia prome di januari, a drenta na vigor e reforma fiscal cu a caba di aumenta e desaster financiero cu ningun hende a spera ariba.
Sin ningun clase di berguensa awor prome minister ta dicidi di punta dede riba comerciantenan como esunnan malbado cu a percura pa cosnan bira caro, ya cu segun su persona y su gobierno, no tabatin necisidad pa esaki, apesar cu su gobierno un suma di 270 miyon for di pueblo, for di comerciantenan pero simplemente e prome minister ta mustra di no tin nocion di kico e ta haciendo y e daño cu e ta causando na nos pais y nos pueblo.
Pa completa e asombro grandi di su mensahenan den ultimo dianan, por lesa cu prome minister Evelyne Wever Croes ta papia di ‘innovacion’ cu ta ‘bay’ bira e driver pa pusha tur cos den economia, tur esaki despues cu el a habraca economia di e pais aki for di otro cu tantisimo medida cu su gobierno a introduci.
For di momento cu e prome medida a drenta cu ta e aumento di accijns riba gasolin ya tabata conoci cu prijsnan di productonan ta bay subi y pa despues su gobierno hinca e bon di aumento di BBO y BAZV pa ranca placa for di pueblo sin cu te awe el a mustra pueblo un solo proyecto cu ta beneficia tur hende.
Sinembargo manera semper tabata e caso cu gobiernonan di MEP, e placa aki ta destina pa financia su propio maneho, un maneho dirigi pa recompensa campañadonan, financiadonan di campaña, sirbi interes di famia y amigonan y lagando pueblo un banda tira manera semper gobiernonan di MEP a haci.
A haci promesa na pensionadonan, a primintinan shelo y tera, cu lo reduci edad di pensioen, cu lo percura cu nan no mester paga belasting mas pero aki nos ta kere cu prome minister tin problema pa compronde e Papiamento cu e mes ta papia, ya cu awor a dicidi cu tur pensionado cu dicidi di busca un entrada adicional pa sobrbibi e aumento di costo di bida barbaro cu a surgi for di momento cu gabinete Wever Croes a tuma poder, lo perde nan reparatietoeslag.
Un hende cu ta papia di tin e hende na pecho, cu e tin e hende central, no ta bay over na castiga e mesun hendenan aki di e forma cu su gobierno a bin ta haciendo.
No solamente a inroduci un reforma fiscal pa haya mas placa, awor prome minister Evelyne ta kere cu e por determina con comercio tin cu draai, acusando semper otronan di su fracaso.
Un aña di su gobierno a pasa bay, sin cu te awe gabinete Wever Croes a presenta su gran plan pa salba comercio den centro di Oranjestad, sin cu el a presenta un compania di petroleo cu tanto el a bisa e conoce, pa sigura apertura di e refineria cu ta nifica tanto pa economia di nos pais, pero simplemente prome minister ta confirma cu su gobierno ta sinta warda kico ta bay pasa cu CITGO pa mira ki pasonan lo tuma.
Otro engaño, otro manipulacion serio di pueblo ya cu simplemente e prome minister no por ta husto cu su pueblo,” Parlamentario Mike de Meza a declara.