Home Police Drie a vier drankjes op, tabata suficiente pa dama Hulandes a keda...

Drie a vier drankjes op, tabata suficiente pa dama Hulandes a keda deteni pa core auto bou influencia

SHARE
Noord: Diahuebs den careda di mey anochi, centraal di polis lo a haya varios yamada di personanan cu a nota un Mini van shinishi coriendo zig zag riba caminda y tabata mustra cu e chauffeur di e auto aki mester ta bou influencia, mesora a manda un patruya riba e caminda prinicipal di Noord
E auto tabata bayendo direccion panort y despues di a yega e luznan di trafico na Noord, e chauffeur a dicidi di djes bira riba e crusada y bay bek pazuid, durante cu e auto tabata birando, ela sorpresa e otro autonan cu nan a hera dal contra dje.
Den e coremento aki e chauffeur a kap dos tire di e auto, ni esaki a strobe di sigui core, e tabata sigui core cu dos tire plat.
Na altura di Imeldahof e patruya di Polis a logra para e minivan y a bin topa cu un dama Hulandes tras di stuur, aparentemente e dama no por a haya su caminda di su cas. Na prome instante e agentenan a trata na yude pa mira si por hibe su cas, pero e dama no tabata coopera cu nan. E agentenan a puntre pa su rijbewijs, e dama no por a mustranan su rijbewijs valido. E agentenan tabata tin hopi dificultad pa comunica bon cu e dama aki.
E agentenan na e sitio a dicidi di pidi pa un alcohol sensor y transportwagen di polis, manera cu e agentenan a haya e alcohol sensor, nan a pone e dama chauffeur aki supla, despues di varios intento ela logra supla, pero e dama a pasa e limite permiti, indicando cu e dama aki no lo por a bebe djes drie a vier drankjes so pero hopi  mas.
 Na momento cu ela keda aresta y tabata subiendo e transportwagen, ainda e tabata bisa polis cu ta solamente vier drankjes so ela bebe, pero e agentenan na e sitio a tuma nan desicion caba di detene y hibe warda di polis caminda elo mester bolbe supla na e machine grandi.
E auto a keda confisca y hiba warda di polis mirando cu un di e bentanan no ta cera y asina evita pa ladronnan bay cu e auto. Danki na esnan atento riba caminda cu a sa di bati alarma, cu polis por a logra kita un chauffeur bou influencia for  di caminda na tempo y asina evita lo peor, coremento di auto bou influencia sigur ta forma un peliger den trafico.