Oranjestad – Recientemente durante un conferencia di prensa Oficina di Turismo a firma un acuerdo cu ‘Dare to Dream Foundation’. E acuerdo aki tin como base di balor agrega pa A.T.A. cu un di nos heroenan nacional, den e caso aki den area di baseball esta Xander Bogaerts, lo forma un parti integral di Aruba su promocion internacional. Ademas, e lo hunga un papel den conscientisacion di importancia di nos turismo localmente. Manera nos tur por corda den luna di november, gobierno di Aruba a nombra Xander como un embahador di bon boluntad pa e isla di Aruba despues di e tremendo trabou cu nos yiu di tera a desplega durante e ultimo ‘world series’ na unda Boston a logra bay cu e titulo maximo.
Ya pa varios luna, incluso prome cu e titulo di campeon di ‘World Series’, A.T.A. a bin ta traha hopi di serca cu e fundacion ‘Dare to Dream’ riba posibel colaboracion y evaluando e diferente posibilidad pa traha riba cierto proyectonan hunto. E obhetivo princicipal den caso di A.T.A. ta pa Xander forma parti di e promocion internacional, specialmente den e area di Boston cual ta e di dos mercado mas importante pa Aruba su turismo for di Merca. Xander sigur ta wordo considera un celebridad na Boston y esaki sin duda ta un gran oportunidad pa yuda promove Aruba mas den e area aki, y enfatisa aun mas e hecho cu Xander ta un Arubiano y kico Aruba ta representa.
Despues di evaluacion di ambos partido a dicidi di colabora por medio di ‘Dare to Dream Foundation’ cual ta e fundacion cu Xander hunto cu su mama Sra. Sandra Brown a funda na november 2013. E fundacion ta enfoca riba hobennan cu kier forma parti di e deporte di baseball pero cu no tin e recursonan pa haci esaki. Nan ta apoya hobennan cu e ekipo necesario pa por train, tambe ta aporta pa medio di training camps y clinics y asina ta brinda hobennan e oportunidad di por desaroya nan talento den baseball.
Na final di 2017 A.T.A. a lansa su campaña di publicidad pa e mercado di Norte America cu ta carga e titulo ‘Authentic Aruba’, na unda ta enfoca riba e hendenan di Aruba, kico nan ta gusta haci, cual ta nan luganan faborito y asina mustra e partinan autentico di nos dushi isla. E campaña aki sigur a evoluciona den 2018 na unda a expande e personahenan di Aruba cu diferente enfoke manera cultura, e parti culinario etc. Debi na e hecho cu ya Xander ta wordo considera un embahador como yiu di tera cosechando exito den e mercado di Merca, a bin cu e idea di inclui Xander como un di e personahenan pa cu e campaña di ‘Authentic Aruba’. Xander lo conta un tiki di su luganan preferi na Aruba y kico ta loke e ta gusta di Aruba. Ademas, e lo mustra su spotnan faborito pa cu baseball y lo enfoca riba Aruba y su famia como parti di su exito.
Presente durante e conferencia di prensa tawata CEO di A.T.A. Sra. Ronella Tjin Asjoe–Croes y Sra. Sandra Brown directora di Xander Bogaerts’ Dare to Dream Foundation cu a firma e acuerdo.
Sra Tjin Asjoe-Croes a expresa su satisfaccion di a yega e punto di por tin un otro di nos heroenan nacional como parti di Aruba su promocion. A gradici tambe pa e colaboracion den esaki.