Durante apertura di IPKO e delegacion Arubano, atraves di e lider di delegacion sr. Thijsen y vocero sr. Tjon, a señala e puntonan cu mester haya su debido atencion den Reino. Specificamente a elabora riba e supervision financiero, situacion di Venezuela y su implicacionnan, “geschillenregeling” y mehoracion di lasonan entre paisnan den Reino.
Comision di Integridad
Aruba ta presidi e comision di integridad y a raporta e desaroyonan actual di e diferente paisnan den Reino pa loke ta integridad. Pa loke ta trata Aruba a splica cu e comision di “versterking democratisch bestel” ta ehecutando trabounan pa percura pa independisa e colegionnan di estado. Ademas a splica cu e Parlamentario sr. Edgard Vrolijk, ta trahando riba e nader rapport pa keda cla cu e leynan cu ta reglamenta screening di ministers y financiamento di partidonan politico.
Venezuela
E punto cu a causa poco conmocion awe entre e diferente delegacionnan tawata e situacion di Venezuela. Despues cu diferente Parlamentario a vocifera nan punto di bista, a breve “schors” e reunion. E delegacion Arubano a keda enfoca riba e hecho cu ta importante pa tur delegacion reconoce e importancia pa yega na un solucion comun.
A finalisa e dia di awe cu bon palabracion pa na final di IPKO tur delegacion por haya nan mes pa oficialmente urgi tur e diferente gobiernonan, pa yega pa concretisa un plan di accion. Asina por mitiga tur e consecuencianan pa e islanan debi na e situacion di Venezuela.
Pa finalisa
Mañan e reunion lo sigui y ta di spera cu e delegacionnan por yega na otro tambe pa e otro topiconan riba agenda. Ta importante pa splica pueblo tambe cu e relacion entre e partidonan di Aruba, esta AVP, RED, POR y MEP ta sumamente positivo pa Aruba. Fraccion di MEP ta conta cu e actitud positivo aki por sigui reina tambe ora cu ta bek na Aruba.
Send