Oranjestad: Diasabra anochi tabata tin e acostumbrado parada di Flambeu den cayanan di Oranjestad, mas cu 11 mil hende a participa den e parada aki y miles y miles di mirones tabata para canto di caminda pa disfruta di e parada.
E parti tristo di esaki ta cu hopi mayor cu no lo tin hende pa keda cu nan yiunan chikito ta hiba nan criaturanan bay mira e parada aki, anto despues den oranan di marduga e criaturanan aki tin cu cana riba caya, cu soño of e mayornan tin cu carganan paso nan a pega soño, esaki sigur por wordo considera un tipo di abuso di mucha.
Un mucha chikito mester tin su derecho di subi su cama 8’or di anochi y no por ta riba caya den oranan di marduga ta canando, of ta den autobus ta cabisha, of ta wordo lastra den stroller of carga.
Tur aña ta e mesun storia, polis ta pidi pa laga mucha chikitonan keda cas, pero esaki niun aña ta wordo respeta. Si un mayor no tin un hende responsabel pa keda cu su yiu, e mayor mester keda cas cu su yiu, paso como mayor bo ta responsabel pe te ora e ta mayor di edad.
Paradanan anochi y actividadnan cu ta caba te den oranan di marduga no ta pa mucha chikito, paso derecho di un mucha mester wordo respeta, un mucha chikito merece su trankilidad anochi, pe por subi su cama y drumi su 8 pa 10 oranan trankil.
Durante e actividadnan y paradanan tin hopi consumo di alcohol, zonido hopi fuerte, por tin problema, bringamento cu por bay for di man. Como un mayor responsabel bo no por expone bo criatura na tur esakinan.
Abuso di mucha mester caba na Aruba, muchanan chikito tin nan paradanan hibanan mira esakinan, parada di mucha, parada di blaas, paradanan di scol, cual sigur ta hopi pa nan por disfruta sanamente di Carnaval.
E sistema na Aruba mester cambia y mester cuminsa respeta derecho di tur mucha na Aruba. Drumimento na ora y den tur trankilidad y no canto di caminda den stroller of na soño den scochi di mayornan cu musica super fuerte, den tur e desordo y cu hopi cunsumo di alcohol.
Nos di arubanative.com ta spera cu Instancianan concerni y Autoridad na Aruba cuminsa actua cu man duro contra tur tipo di abuso incluyendo mayornan cu ta cana cu muchanan chikito laat riba caya.
Ta bira tempo pa concientiza mayornan cu muchanan chikito riba caya te den oranan di marduga, ta un abuso di mucha, mester por cuminsa na hala mayornan atencion y actua cu man duro pa cu esaki, paso nos criaturanan cu ta lantando ta nos futuro y nos kier un mihor futuro pa nos isla ban stop cu abuso di mucha den tur forma y na tur momento.
Criatura marduga canando den Emanstraat, despues di Fakkel.
Mucha na soño ta wordo carga despues di Fakkel. Fotonan ta saca despues di 1’or di marduga.