Diadomingo 6 di januari 2019 ta recorda cu tabata 30 aña pasa cu un cambio fundamental a tuma lugar den henter e panorama politico na Aruba, na momento cu nos pais a bay urna electoral pa eligi su representantenan den Parlamento. Sin duda cu tur hende lo puntra nan mes pakico e eleccion di 1989 tabata asina importante pa pais Aruba?
E motibo principal ta cu esaki tabata e prome eleccion cu a ser lidera pa sr. Nelson Oduber, despues di fayecimento di nos lider inmortal Betico Croes y esaki el a haci den forma hopi exitoso. Mester enfatisa cu e periodo aki tabata uno hopi scur den nos historia politico caminda nos pais tabata ser goberna pa un minoria di apenas 28% di electorado Arubano, pues contra tur regla democratico. Normanan di fatsoen, moral y decencia a ser viola na un manera flagrante door di Gabinete Henny Eman. Tambe nos no mester lubida con e tempo ey e hendenan di MEP tabata ser persigui malamente y hopi di nan a wordo kita for di trabao pa motibo di nan color politico. Sinembargo nos lider Nelson Oduber no a core pa tur e retonan aki y a logra traha un lista ganador consistiendo di candidatonan decidido kendenan sin miedo a subi e lista di MEP.
Cu e lema di campaña “Un Futuro Briyante pa Un y Tur”, partido MEP a bay eleccion dia 6 di januari 1989 y a gana esaki den forma aplastante cu 10 asiento y pa falta di 23 voto no a logra e mayoria absoluto di 11 asiento. Como resultado di e eleccion partido MEP hunto cu e partidonan PPA y ADN a forma un gobierno, Gabinete Oduber 1 y a trece logronan grandi y historico pa nos pueblo durante 1989-1993.
Reapertura di refineria Coastal
Asina cu e coalicion aki a sinta, ex-Prome Minister Nelson Oduber a percura pa para di inmediato e desmantelacion di refineria cu a inicia bao di Gabinete Henny Eman y a cuminsa negocia cu Coastal pa logra reapertura di e refineria. Y dia 19 di oktober 1989 Parlamento di Aruba a aproba e contrato cu Coastal y cual a encera e.o. cu e refineria lo permanece minimalmente 20 aña na Aruba. Finalmente e reapertura a bira realidad dia 20 di april 1991. Cu e reapertura aki tambe un era di progreso economico a bolbe cuminsa pa Aruba en general y pa San Nicolas en particular. Danki na e resultado di eleccion di 1989 esaki a bira posibel!
Scrapmento fecha di Independencia 1996
Dia 13 di juli 1990, ex-Prome Minister Nelson Oduber a firma hunto cu Minister Ernst Hirsch Ballin un convenio, unda a scrap e fecha di Independencia di 1996 for di den Statuut, pero Aruba a mantene e derecho di autodeterminacion, esta cu nos pueblo lo dicidi ki dia nos lo kier bira independiente dia cu nos pueblo ta desea esaki, via un Referendum y cu aprobacion di 2/3 parti di nos Parlamento. Danki na e resultado di e eleccion di 1989 e logro aki tambe a bira realidad!
Otro logronan di Gabinete Oduber 1
Saliendo for di punta di bista cu empresanan di utilidad mester ta den man di pueblo, dia 3 di september 1990 sr. Nelson Oduber a firma contract pa compra di e compania di electricidad ELMAR for di OGEM. Y na aña 1992 a firma tambe un contract cu Exxon pa traspaso di e terrenonan den Seroe Colorado pa pueblo di Aruba, unda tur e casnan, Esso Club, International School, e canchanan di tennis etc. a bira di pueblo.
Tambe Gabinete Oduber 1 a percura pa entrante 1 januari 1990 separa e entradanan di pareha casa y dia 31 januari 1991 a firma un convenio pa haci casi 1000 arbeiders y werksters ambtenaar; a percura pa pago igual pa trabao igual pa e ambtenaarnan; a re-introduci pa paga na tur e empleadonan publico y di fundacionnan cu ta haya subsidio, vakantieuitkering; a percura pa debolbe e empleadonan publico na 1990 locual nan a entrega na 1985, esta e reduccion di salario di 7 3/4 – 8.5%; a percura elimina e abuso di contratonan di corto duracion, unda tin continuidad di trabao; a laga cambia ley di e forma ey ambtenaar cu nan yiu no tabata bini na remarca pa placa pa yiu y gastonan medico paga pa gobierno tambe por ricibi esakinan.
Esakinan ta parti di e logronan di mas importante cu a ser ehecuta durante Gabinete Oduber 1 (1989-1993) y ta muestra cu e eleccion di 1989 tabata hopi importante y instrumental pa logra traha cu vision, curashi y determinacion na vanguardia di henter nos comunidad, tanto riba tereno economico, social, estatal y derechonan di e clase trahador.