Fundacion Mi Cutisa (FMC) ta coordinando pa prome bez un filmacion pa un documentario di Dande. E filmacion ta tuma luga bou di guia di e cineasta Cindy Kerseborn, hunto cu e camarografo Ricky Cramer y un specialista di sonido Daan Arens. E film crew aki, cu tin ya varios aña ta traha hunto procedente di Hulanda, ta traha hunto cu dos persona local cu ta reforsa nan team. Alexis Tromp di AlexisTromp.com ta fungi como e asistente di e film crew y Arthur Kelly ta e persona cu ta tene tur e entrevistanan cu e protagonistanan cu ta participa den e documentario.
E meta di e documentario aki ta pa documenta nos tradicion di Dande na Aruba y particularmente trese dilanti kico ta e diferencia entre e Dande di Tambu y e asina yama Dande di Fio. Actualmente na Aruba, Vicente Ras ta e unico musicante di Dande cu ta canta y toca e Dande di Tambu. E documentario ta trese dilanti varios cantado di Dande y nan historia relaciona cu e tradicion di Dande. Asina aña pasa a filma Vicente Ras y su grupo y tambe Sra. Titi Tromp, cu tin un grupo di Dande cu ta consisti di mayoria hende muhe. E aña aki a entrevista famia di Maiky Croes, cu ta un famia cu tin 4 generacion cu ta canta Dande, cuminsando cu Mo Jonchi Croes (d.f.m.) kende ta e prome cantado di Dande cu a graba un cantica di Dande riba disco.
E proyecto aki a haya e sosten financiero for di aña pasa y e aña aki di Prins Bernhard Cultuur Fonds, Aruba Tourism Authorities, Utilities Aruba, WEB en Elmar N.V., Setar N.V., New India Insurance Company, AIB-bank, Pueblo di Aruba cu a contribui pa medio di un Radio Telethon y tres sponsor anonimo. E documentario aki a ricibi e apoyo tambe di e Minister di Finansa, Asuntonan Economico y Cultura, Sra. Xiomara Ruiz Maduro y Minister di Asuntonan Social, Labor, Sr. Glenbert Croes y Minister di Turismo, Salubridad Publico y Deporte, Sr. Danguillame P. Oduber. Cu nan aporte por a sigui graba e aña aki tambe hunto cu e sosten di tur e protagonistanan cu ta participa na e grabacionnan y un cantidad grandi di hende cu di un forma of otro a duna nan apoyo na e proyecto aki. Directiva di Fundacion Mi Cutisa kier gradici particularmente tur e boluntarionan cu ta forma parti di e Comision di Trabou cu ta carga e Proyecto di Dande aki ya pa dos aña consecutivo
Mirando e bercadura di e proyecto y e nivel profesional di e produccion di un documentario cinematografico, e gastonan pa por realisa e nivel di produccion aki ta basta halto y ainda no a logra haya tur e fondonan pa cubri tur e gastonan. Pa e motibo aki Fundacion Mi Cutisa ta haci un apelacion un biaha mas na e pueblo di Aruba y nos comerciantenan cu ta ricibi Dande tur fin di aña, pa sostene e proyecto aki pa medio di haci un donacionan riba number di cuenta # 2103960190 na Aruba Bank, mencionando Proyecto di Dande. Pa esnan cu no ta biba na Aruba e swift code ta ARUBAWAX.
Danki di antemano pa e bunita gesto cu por yuda nos documenta, conserva y promove nos herencia cultural intangibel di Aruba pa mundo henter cera conoci cu nos Dande.
Di parti di Fundacion Mi Cutisa, e Comision di Trabou y e film crew di e Proyecto di Dande.
Cineasta Cindy Kerseborn