Home Entertainment APA a celebra cu su empleadonan e exito di 2018 y preparacion...

APA a celebra cu su empleadonan e exito di 2018 y preparacion pa retonan nobo den 2019

 

Pa cera un aña 2018 exitoso, gerencia di APA a organisa un encuentro di Pasco pa su empleadonan, como muestra di agradecimento.

Esaki a tuma luga e diabierna prome cu Pasco, unda sala di encuentro na Piedra Plat a wordo dorna den ambiente di Pasco pa brinda e empleadonan di Aruba Ports Authority e ambiente festivo di fin di aña. APA kier a brinda su empleadonan un momento special y esey a logra den Piedra Plat Ballroom unda cu tur e empleadonan tabata hunto den un solo sala y por a comparti berdaderamente cu otro e anochi aki.

Durante e anochi aki a recorda tur e momentonan agradabel di 2018, e exitonan cu APA a logra cu crecemento riba diferente tereno, e resultadonan positivo pa cu e mudansa di waf pa Barcadera y e contribucion di APA na economia di pais Aruba. Na mesun momento a papia di kico ta spera pa 2019 cu e colaboracion y apoyo fiel di e empleadonan di APA cu semper a traha manera un famia cu otro.

Resto di anochi a wordo anima pa e banda 1 of a Kind (1 OAK) y tambe tabatin animacion di Santa Claus cu  a trece e ambiente di Pasco. E trahadonan tabatin chens pa saca potret hunto cu nan pareha como un recuerdo di celebracion fin di aña 2018. Gerencia di APA a percura pa diferente premio cu a wordo rifa bou di su empleadonan. E premio grandi di e anochi aki tabata e biahe abordo di un crucero. E feliz ganador a resulta Johnny Martes, kende a ricibi e premio for di representante di APA sra. Yahaira Croes hunto cu director interino di APA Humprey Tromp.

APA den 2018 a logra diferente proyecto importante manera a crea espacio necesario, den profundidad waf, pa ricibi barconan crucero mas grandi cu mester di mas espacio ora di maniobra y drenta haf. Tur esaki na bienestar di economia di Aruba.

E anochi a wordo cera cu mensahe di director ing. Jossy Figaroa, kende a desea e empleadonan un Feliz Pasco y un aña 2019 yena di Bendicion, Salud y Prosperidad pa nan y famia, trahando na bienestar di APA. Esaki ta e deseo tambe di Aruba Ports Authority  pa henter pueblo di Aruba. APA tey pa Aruba.