Parlamentario Croes ta felicita coleganan di Coalicion y sigur Fraccion di MEP pa e trabaonan eherce den e promer aña como Parlamentario di Pais Aruba. No tabata facil locual a wordo hereda. Tampoco tabata facil pa cuminsa cu e trabao pa restaura confiansa bek den nos comunidad. Como Parlamentario nos a drenta Parlamento no na e momento mas oportuno. Den ekipo a logra di haci masha hopi trabao. Un cantidad di reunionnan di comisionnan fiho, serie di encuentro (bijeenkomst) den Parlamento, reunionnan di Comision Central, reunionnan publico pa trata leynan importante di pais Aruba.
Banda di tur esaki atende masha masha hopi hende den comunidad cu tabata tin mester di un atencion y/of guia y alaves reuni cu masha hopi departamento y instancianan importante di pais Aruba. Algun di e leynan importante cu a wordo trata durante 2018 tabata presupuesto di pais Aruba 2018, crisis heffing, bestemmings fonds crisis plan, TPEF, suppletoire begroting cual porcierto tabata budget neutral, explotatie rekening 2016, presupuesto di pais Aruba 2019, motorrijtuig belasting, Reforma Fiscal pa nombra algun. Pa fin di aña lo publica un resumen di tur e trabaonan. Esaki ta parti di trabaonan eherce banda di atende reunionnan cu e problematica di CITGO y situacion di Venezuela y alaves reunionnan cu CAFT pa atende asuntonan di Aruba.
Parlamentario Croes ta contento di por forma parti di e Coalicion y e elenco di Fraccion di MEP den Parlamento kendenan ta trahando fuertisimo pa logra cumpli cu nan tarea, esta controla gobierno na e mihor forma cu por. Croes ta gradici pueblo pa nan comprension y espacio duna pa por traha den e situacion caotico hereda. Den 2019 tin masha hopi trabao riba agenda, entre otro un cantidad di ley cu mester wordo trata y otro leynan cu lo mester wordo modernisa. Parlamentario Croes ta continua splicando cu e trabao no ta facil y como Parlamentario bo ta hinca masha hopi ora pa siman pa por purba cumpli y logra cu e meta, esta sirbi bo país Aruba na e mihor forma posibel.
Croes ta bisa cu te hasta diasabra mayoria di e Parlamentarionan di Fraccion di MEP ta bay trabao pa cumpli cu 4 à 6 ora di trabao preparando pa e siman siguiente y tin biaha te hasta diadomingo. Trabao di un Parlamentario ta uno dinamico y pa bo por cumpli y ta exitoso bo mester ta yena cu energia positivo cada dia den combinacion cu un pasion enorme pa bo trabao. Terminando Parlamentario Endy Croes kier desea henter pueblo di Aruba un Bon Pasco. Laga e nacemiento di Niño Hesus ta un refleho di paz y hermandad den nos curason.