ORANJESTAD – Recientemente compania di awa y energia WEB Aruba a firma un contrato cu e compania internacional Wärtsilä pa construi un planta di energia cu motornan RECIP riba tereno di WEB. E planta nobo ta consisti di 6 motor RECIP cu un capacidad total di 102 MW. Cu esaki ta crea un base firme pa e transicion pa un futuro mas limpi y liber di Heavy Fuel Oil (HFO). E motornan lo crea e flexibilidad den e mix di energia actual y ta mas eficiente compara cu e boilernan anticua cu ainda ta forma parti di e planta. Consecuentemente lo reemplaza e boilernan cu e motornan nobo. Uzo di e planta, cu lo yama RECIP fase IV, lo conduci na un reduccion drastico di uzo di combustibel y pues menos emision di carbon, cual lo tin un impacto positivo riba medio ambiente.
E planta lo opera inicialmente riba HFO. Sinembargo, asina cu gas likido natural (LNG) bira obtenibel na Aruba, e planta lo opera primariamente riba LNG. En caso ta necesario, e planta di motornan RECIP lo tin e capacidad di switch pa HFO y of algun otro tipo di fuel oil.
E flexibilidad di e 6 ‘Wärtsilä 50DF dual-fuel engines’ cu lo suministra e energia di e planta, ta facilita e integracion di nivelnan halto di energia di biento y solo den e sistema. Nan capacidad pa yega na un resultado maximo den cuestion di minuto y suministra un balansa efectivo, ta sigura un stabilidad di e sistema pa carga fluctuacion inevitabel den suministro di energia di biento y solo.
“WEB a bin ta tuma pasonan agresivo pa aumenta eficiencia y diversidad den su plantanan di energia. Punto di enfoke den esaki ta adoptacion di nivelnan mas halto di energia sostenibel. Pa e motibo aki nos mester reemplaza nos planta existente cu ekipo mas eficiente y flexibel den uzo di combustibel. E planta di motornan RECIP nobo di Wärtsilä tin e eficiencia y flexibilidad cu ta cuadra cu nos necesidadnan”, asina Luis Oduber, CEO di WEB Aruba a comenta durante e acto di firmamento di e contract hunto cu Rodney George, vice presidente di Caribbean Wärtsilä Energy Solutions.
A planea pa Wärtsilä entrega e planta na WEB den di 4 kwartal di 2019 y pa e ta completamente operacional na februari di aña 2020.