Medidanan ta ranca 160 miyon di pueblo
Parlamento diahuebs mainta a trata un pakete di cambio den ley di belasting, un seccion di e prome fase di e ley di Reforma Fiscal. E cambionan aki partido AVP tabatin diferente critica riba nan, pa e forma con e ta wordo haci y e consecuencianan cu esaki ta trece cun’e.
Lider di AVP Mike Eman durante un conferencia di prensa a papia riba loke e ta yama e “pakete di medida”.
Un di e aspecto ta, cu ta bay sconde e diferente schakel cu e impuesto di BBO ta trece cun’e, pasobra e belasting aki no ta bay aparece mas riba recibo di clientenan. Pues e clientenan no sa cuanto di e aumento di prijs di un producto ta a consecuencia di BBO y cuanto esaki ta compara cu antes.
Mirando cu tin tres schakel, esaki ta nifica cu por lo menos 3×6% ta wordo scondi den e recibo y si e comerciante mustr’e toch, e por haya un multa. Mirando cu e comerciante lo hinca un parti di chikito di su gastonan di operacion cu a aumenta tambe den e prijs, e consumidor lo bay paga sigur un 20% extra cu lo afecta su poder di compra.
Gobierno ta specula cu e lo no bay afecta e consumidor, ya cu nan Loon- y Inkomstenbelasting ta bay baha. Durante tratamento di presupuesto 2019 a bisa cu Loonbelasting lo baha cu 16 miyon florin pa cambio cu ta bin cu e Reforma Fiscal.
Na otro banda, ta wordo bisa cu e aumento di BBO y Grondbelasting lo trece 14.5 miyon florin extra pa caha di Gobierno y cu e BAVP introduci dor di e Gobierno aki lo haya 100 miyon extra y BAZV cu ta otro 40 miyon florin extra.
Pues 160 miyon florin ta wordo ranca for di pueblo y ta duna comunidad 16 miyon.
“Y ta bisa cu henter Aruba ta bay beneficia cu e cambio husto. Pa nos esaki ta inaceptabel. Den e dianan aki un bes lo haci un yamada na tur e gremionan pa no bira complice di un situacion di pobresa, un situacion di decadencia di economia di Aruba.
No por t’asina cu sindicatonan ta para mira cu nan miembronan ta perde mas cu 10% di poder di compra, cu comercio ta mira cu nan miembro ta perdiendo benta y asina mes tin un silencio total pasobra e Gobierno aki ta intimida nan.
Bo no por ta un dirigente sindical of di un organisacion comercial si bo miembronan ta bayendo atras, y bo no ta haciendo nada. E posicion ey no ta cuadra pa un persona asina como un dirigente. Ta momento pa cada hende asumi nan responsabilidad den e comunidad aki, mescos cu nos miembronan ta den Parlamento batayando y ta preparando nos hendenan pa ora mester dicidi si ta basta.”
E lider a cuestiona con Gobierno ta gaña pueblo, partiendo flyer tur caminda di e “cambio husto” unda ta duna un tiki y mester paga 3 biaha mas hopi na prijsnan nobo. Tur hende ta bay perde dramaticamente cu e direccion cu e Gobierno ta tumando.
E ley di Reforma Fiscal ta bisa cu na caminda tin mas cambio pa bini. Pasobra nan tin na caminda “sin taxes” cu lo wordo poni riba tur producto cu tin sucu y for di esaki so lo bay saca 16 miyon florin mas, cual ta esun cu nan duna bek na Loon- y Inkomstenbelasting.
Con por bisa pueblo cu nan ta bai dilanti cu un “cambio husto”. Aki e limite di di falta di berguensa a yega un punto cu no ta aceptabel mas den nos comunidad. Hunto nos mester pone un paro na e situacion aki. Loke ta bay sosode ta cu BBO su 18% ta wordo ancra den e ley.”
Tambe den e ley tin un aumento dramatico di accijns. Alcohol no ta bon, e lider a bisa. Pero na tur pais den momentonan di celebracion ta custumbra di bebe algo y den e ley por mira cu pa bebidanan alcoholico whisky y rum ta bay tin un aumento di 40% di accijns. Y loke ta straño ta cu e biñanan di mas caro no ta conoce aumento, pero e biñanan di mas barata, manera esnan di fruta, ta bay subi cu 100 te cu 400 florin pa hectoliter.
“Esaki no ta bebidanan di alcohol pisa. Ta e tipo di aumentonan aki den un economia cu ta den recesion cu -0.5% di decrecemento y ta bin cu un pakete di medida y bisa pueblo cu esaki ta husto? Di unda mas bo kier pa pueblo saca placa? “ lider di AVP Mike Eman a declara.