Den un informe di UNESCO relaciona cu enseñansa tin un parti hopi crucial cu merece tur atencion y Parlamentario Sue-Ann Ras (MEP) a trece esaki dilanti durante su disertacion ultimo durante tratamento di presupuesto. E informe ta indica cu gobierno mester yuda na construi confiansa den e sistema educativo, elevando e status profesional di e docentenan, mehorando e capacidad di e lidernan escolar y promoviendo e colaboracion a trabes di e comunidadnan di aprendizahe profesional.
Bon Gobernacion
“Confiansa ta un balor cu bo no ta yega cumpra of adkiri, e ta tuma tempo, dialogo, comprension y actuacion pa logra esey. Mi ta djis spera, cu nos no mester yega na e nivel di Grecia si, unda tin un gran desconfiansa entre e docentenan y gobierno, cu a paralisa cualkier discusion tocante responsabilidad durante aña, segun UNESCO a indica,” Ras a bisa.
Den e programa di gobernacion pa loke ta trata enseñansa, Gobierno di Aruba lo percura pa propone cambio di e leynan di enseñansa pa e directivanan di scol por aplica Bon Gobernacion (Good Governance). E aplicacion di Bon Gobernacion ta sosode cu e ayudo y sosten di Departamento di Enseñansa. Banda di esaki Minister di Enseñansa Ciencia y Desaroyo Sostenibel ta duna di conoce den su “beleidsvoornemens” di a topa cu e irregularidadnan den e fundacionnan, cu ta maneha e fondonan di pais Aruba pa e scolnan. Ademas, den e “beleidsvoornemens” tin poni como punto di prioridad, cu gobierno di Aruba, lo promove profesionalismo y transparencia den e directivanan di scol sigurando calidad den enseñansa den tur sentido di palabra. P’esey mes ta importante pa minister informa Parlamento tocante; e resultado di e evaluacion di e maneho di subsidio na e directivanan, kico esaki ta nifica pa e maneho nobo, kico ta e plan di minister pa loke ta trata intervencion di e companianan forensico y di contabilidad, cu lo contrata pa traha riba e tema di integridad financiero pa e investigacion y duna un bista di e regla- y proceduranan nobo pa logra integridad financiero.
Ta di lamenta y condena tur e directivanan di scol como tambe tur instancia cu ta haya subsidio y cu no ta entrega e relatonan anual, p.e. SKOA, cu ainda falta di: 2016, 2017 y 2018. “Ta dificil pa ami eherce mi trabou debidamente y nan ta pone cu ami mester contradeci nos leynan. Mediante ley Parlamento ta aproba e cantidad di placa pa subsidio y Parlamento tin e derecho legitimo pa sa, unda e placa di pueblo ta bay”, Ras a expresa.
‘NORMBEDRAGEN’
For di 2010 a revisa e ‘normbedragen’ pa loke ta trata suma pa alumno como tambe pa lokaal, pa aña escolar. Ta bisto cu e cifranan no ta compatibel mas, pa loke ta encera brinda enseñansa di calidad. Ras a haci un apelacion na minister, pa revisa esaki mas pronto posibel y ta spera cu pronto minister por presenta e resultado tocante e revision y un proposicion nobo, cu ta uno mas realistico y husto pa bienestar di enseñansa.
E motibo cu esaki ta asina importante ta, cu unabes tur relato anual ta entrega como tambe e revision y investigacion di ‘normbedragen’, por analisa e situacion mihor y adapta e contribucion escolar.