Den e reunion publico di diahuebs ultimo tratando presupuesto 2019 di Ministerio di Asuntonan General, Integridad, Innovacion, Organisacion Gubernamental y Energia, esta di Prome Minister Evelyn Wever-Croes, parlamentario Shailiny Tromp-Lee a cuminsa su disertacion elaborando riba e echo cu opositornan politico kier tilda Gabinete Wever-Croes cu nan no ta cumpli cu e pensionadonan. Pero e opositornan aki ta come lubida ya cu ta nan mes a perhudica e grupo di pensionadonan. Ta nan a kita nan derechonan y awe kier grita den parlamento cu e gobierno aki no ta cumpli. Pero segun sra. Tromp-Lee, Gobierno ta dunando e asunto aki su debido atencion y ta spera cu enberdad den e 4 aña di Gabinete Wever-Croes nan por logra atende debidamente cu esaki.
Jaarverslag 2018
Tambe parlamentario Tromp-Lee a haci uzo di e oportunidad pa felicita y gradici Ministro Presidente cu presentacion di su Jaarverslag 2018. E jaarverslag ta demostra cu Minister President ta traha den forma transparente y ta responsabilisa debidamente e presupuesto cu Parlamento a aproba pa e usa den 2018. Alabes sra. Tromp-Lee ta urgi Minister President pa percura pa su colega ministernan tambe traha nan jaarverslag 2018.
Den e verslag e parlamentario por a tuma nota di diferente concepto di ley cu Minister President ta bezig cu nan of lo bay inicia den e aña nos dilanti. El a pidi Minister President pa duna un update di con leu nos ta cu e Begrotingskamer y e Integriteitskamer. Esakinan ta institutonan necesario pa pone ordo bek den e desordo y crea e confianza bek di pueblo den gobierno. Ta di suma importancia pa nos percura pa pone e fundeshi necesario pa por preveni cu loke a tuma lugar durante 8 aña di Gabinete Mike Eman no por keda ripiti nunca mas!
Reenforsando BUVO
Minister President a menciona den su Jaarverslag cu el a percura pa reenforsa BUVO. Un departamento cu e gobierno anterior a pone den coma, mientras a gasta sumanan astronomico na voorlichting en promotie cerca amigonan cu tabata wine & dine cu e gobernantenan, sin lubida e cantidad enorme di airmiles cu nan a logra acumula riba custia di pueblo.
Crisis di migracion
Otro punto cu tin Sra. Tromp-Lee hopi preocupa ta e crisis di migracion cu nos pais tin pa loke ta trata e fluho grandi di personanan cu ta bin di nos pais bisiña. Gobierno a institui un comision multi disciplinario cu ta conseha gobierno ariba e tereno aki. E parlamentario kier a haya un update di e desaroyonan y maneho stipula a base di e consehonan di dicho comision. Sin embargo e kier enfatisa cu nos ta convivi cu e situacion na Venezuela pero Aruba ta un isla chikito cu conoce su limitacionnan y na tur momento nos mester percura pa proteha nos mercado laboral pa nos localnan.
Prijs di awa y coriente
Pa loke ta trata e deseo di Gobierno pa baha prijs di awa y coriente, sra. Tromp-Lee kier haya un update ariba e tereno aki. E ta debidamente consciente cu esaki no tabata alcansabel pa e aña aki pero kier sa di Minister President con leu nos ta den e proceso pa berdaderamente crea e alivio cu tanto pueblo ta desea ariba e dos gastonan mensual aki.
Deficit 2019: 25 miyon florin
Siguientemente sra. Tromp-Lee a amplia riba e deficit di 25 miyon florin na 2019 cu sigur ta hopi mihor cu e deficit di aña 2017 cu tabata 149 miyon florin. Hopi importante ta cu e deficit di 25 miyon ta den e margen di palabracion cu Hulanda y contrario na loke contrincantenan politico ta purba di malinforma pueblo, e realidad ta cu documentonan cu Parlamento a ricibi ta mustra claramente cu e gastonan total di pais Aruba pa 2019 ta baha cu casi 12 miyon florin (11.820.100) compara cu aña 2018. Sra. Tromp-Lee ta di opinion cu como parlamentario nos mester haci nos trabou corectamente y sigur mester informa pueblo debidamente. Mester stop di hunga cu cifra djis pa crea polemica y hunga politikeria. Pakico e opositornan no ta papia di e debe cu nan a redobla? Dicon nan no ta papia di e interes barbaro cu nos mester paga anualmente? Pasobra e realidad ta cu den 2019 nos ta bay paga mas cu 232 miyon florin na interes. Esaki ta 636.463,- florin pa dia! Placa cu nos por a hinca den seguridad, den nos enseñansa, den nos famianan y asina por sigui menciona. Sra. Tromp-Lee a puntra Minister President ki ta e punto di bista di Hulanda pa loke ta trata e posibilidad pa yuda cera un zachte lening pa nos pais. Den su opinion Hulanda ta keda co responsabel pa e desaster cu a keda ocaciona door di AVP y Mike Eman.
Finalmente e parlamentario a elogia Minister President pa e tremendo trabao cu el a realisa den 2018 y e ta convenci cu e lo sigui traha a base di integridad, transparencia y cu mesun amor, dedicacion y disciplina.