Home » Minister mr. Xiomara Ruiz-Maduro: Presupuesto 2019 di Pais Aruba a keda aproba pa Parlamento

Minister mr. Xiomara Ruiz-Maduro: Presupuesto 2019 di Pais Aruba a keda aproba pa Parlamento

by Admin
0 comment 51 views

 

Aruba riba caminda pa recobra e credibilidad financiero  local y internacional

 

Oranjestad, 20 december 2018 –  Minister di Finansa, Asuntonan Economico y Cultura ta informa cu despues di varios dia di reunion intensivo den Parlamento pa trata e Presupuesto 2019 di Pais Aruba, esaki a keda aproba den Parlamento di Aruba. E mandatario encarga cu Finansa, Asuntonan Economico y Cultura a contesta tur pregunta di Parlamento riba Presupuesto 2019, mester trece dilanti cu a bin hopi remarke politico cual e mandatario a adresa pero di otro banda no por keda perde tempo cu politikeria di oposicion. Mester trece dilanti cu e mal maneho hiba pa e gobierno anterior a causa hopi daño na e credibilidad financiero di nos pais y desde e promer dia di gobernacion a bin ta haci esfuersonan pa por recupera e credibilidad financiero di Aruba. Cu e aprobacion aki Gabinete Wever-Croes a logra pa nos Pais por tin un presupuesto promer cu comienso di e aña nobo.

Gobierno a traha hopi duro pa logra baha e deficit di Presupuesto 2019 di Pais Aruba na 25 miyon florin, compara cu e Presupuesto 2018 cu tabatin un deficit di 149 miyon florin. Alavez Gobierno a haci un ehercicio hopi grandi pa locual ta trata “debt management” y asina a logra baha e necesidad financiero pa 2019 cu 119 miyon florin (di 401 miyon florin pa 282 miyon florin).

Den aña 2018 cu tabata e aña di transicion, Gobierno a stipula un Maneho Financiero di Pais Aruba den un Memorando Financiero y Economico (FEM) y un Plan di Maneho pa Baha Gasto di Personal. Esakinan lo sirbi como guia pa cana den e direccion di un finansa publico manehabel y sostenibel, den e añanan nos dilanti. Gobierno lo sigui traha duro pa maneha e gastonan di personal y tambe pa baha e debe. Den aña 2019 Gobierno lo cuminsa cu implementacion di e tarea dificil y importante aki.

Presupuesto 2019 di Pais Aruba tambe a conoce pa promer biaha un “meerjaren begroting” den cual for di awor aki caba a stipula e cuadro financiero cu Pais Aruba lo conoce atraves di e Presupuestonan den e añanan nos dilanti. Di e manera aki ta bin un transparencia den finansa publico y tambe den e rumbo cu Gobierno lo hiba finansa di Pais Aruba. Na e manera aki nos comunidad por tin un bista adelanta di con e entrada, gastonan y inversionnan di e sector publico lo ta hinca den otro pa e tempo nos dilanti.

Cu aprobacion di Presupuesto 2019, Gobierno a scohe pa hiba Aruba su finansa publico den un rumbo diferente na locual nos por a observa ultimo tempo. Gobierno ta riba un caminda di recuperacion di credibilidad financiero local y internacional. Esaki ta di sumo importancia pa recobra e confiansa di e inversionistanan y restablece e confiansa den Reino. Mas importante ainda, esaki ta un muestra cu Gobierno ta rumbo pa crea espacio pa nos Pueblo y principalmente e generacion cu ta sigui pa conoce un desaroyo sostenibel den cual tin oportunidad pa por hiba un bida digno riba nos Pais Aruba.

Di parti di Minister Xiomara Ruiz-Maduro ta bay un palabra di gratitud pa tur experto cu a yuda prepara e Presupuesto 2019 di Pais Aruba, na coleganan Minister di Gabinete Wever-Croes pa  e cooperacion y sosten y na tur miembro di Parlamento di Aruba pa e debate riba nivel y nan aprobacion pa Presupuesto 2019 di Pais Aruba. Minister di Finansa, Asuntonan Economico y Cultural, Xiomara Ruiz-Maduro ta convenci cu hunto nos ta tumando e pasonan firme den e bon direccion y logra haci e cambio positivo pa Aruba!

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio