Durante presupuesto di Minister di Enseñansa, Ciencia y Desaroyo Sostenibel hopi pregunta a bin dilanti y parlamentario Sue-Ann Ras (MEP), sigur a haci hopi pregunta.
Educacion ta un di e factornan cu mas ta influi den e avance y progreso di e personanan y e sociedadnan. Ademas di provee y adkiri conocemento, educacion ta enrikece cultura, humanidad, e balornan y tur loke ta caracteriza nos como ser humano.
“Cu mi tin hopi pregunta awe pa e titular di enseñanza, no tin duda, pero esaki ta debi di mi experiencia di 1 aña como Parlamentario y ora mi haci uzo di mi herment pa haci pregunta na minister por escrito, ta dura como 3 luna pa mi haya contesta, cual ta impidi pa ami sigui haci mi funcion debidamente. Tur e preguntanan aki cu minister a haya, por a evita tambe, si e comision fiho di enseñansa ta mas activo, ya cu ta 5 reunion so tabatin y p’e aña parlamentario nobo, cu a inicia dia 11 di september y te cu awe, no tabatin niun reunion. Sin embargo tin asina tanto desaroyo den enseñansa, manera mi por compronde den media”, Ras a cuminsa bisa.
MANEHO DI IDIOMA
Maneho di idioma no ta conoci ainda pa e comunidad di enseñansa. Sinembargo por a compronde cu pais Aruba, pa medio di su planificacion nacional, pa loke ta trata SAM (Scol Arubano Multilingual) na comienso di 2018 a orienta y a prepara e directivanan di scol riba e maneho di idioma nobo, cu lo drenta den e fase di preparacion na augustus 2019. Sinembargo e maneho nobo aki no ta conoci ainda pa nos maestronan, cu ta e actornan principal y tampoco comunidad y mucho menos comision di enseñansa, mientras cu esaki ta e base principal di enseñansa, specialmente esun multilingual.
Varios pregunta tocante e fasenan di orientacion, maneho y implementacion tanto riba termino inmediato y largo a bin dilanti, specialmente cu e minister mes a indica cu esaki lo ta interministerial.
PRESUPUESTO DI INNOVACION A BAHA CU 59%
Maneho di idioma nobo tin su influencia riba SAM. Por a tuma nota cu a baha e presupuesto pa loke ta trata e proyectonan di innovacion den enseñansa cu 59% pa 2019. Den programa di gobernacion a stipula cu lo aloca e fondonan disponibel pa implementacion di Papiamento (banda di otro idiomanan) den enseñansa. Y p’esey ta importante pa haya sa con minister ta wak esaki factibel, teniendo cuenta cu a baha netamente e fondonan cu mester aloca. Na momento cu Aruba inicia e di dos fase (fase di preparacion) di SAM, e fase aki ta implica e.o. preparacion di e directivanan di scol y e ekipo di scol. Pues ta deseabel pa sa, si minister mester un plan realistico (teniendo cuenta cu e parti financiero), pa e fase di preparacion tuma lugar y cumpli cu e meta di dicho fase. Sin laga afo ki plan y con extenso e profesionalisacion riba e areanan di didactica y curiculo lo ta, si tene cuenta cu e cantidad di placa cu lo mester aloca den e parti aki, cu a baha considerablemente? Y mirando cu Papiamento lo drenta enseñansa, con ta para cu e docentenan Hulandes y/of Surnameño cu ta dunando les of cu lo bin pa duna les?
Ta sali for di e punto di bista cu IPA, Centro di Desaroyo y Profesionalisacion Continuo (CDPC) lo carga e parti di profesionalisacion. Ta responsabel pa sa, con lo bay percura pa tin suficiente persona pa duna e cursonan necesario? Como tambe ki plan tin pa e cursonan cu IPA, CDPC lo duna na e maestronan di scol multilingual ta uno duradero y cu realmente lo uza esaki den practica.
E METANAN FINAL PAPIAMENTO SCOL SECUNDARIO
Na juli 2019 e di dos grupo di studiante di psml ta finalisa scol basico. Den e “beleidsvoornemens” di minister, lo laga e profesionalnan monitor e desaroyo di e hobennan den enseñansa secundario. “Di e profesionalnan den scol mi por compronde, cu e hobennan aki tin un nivel mucho mas halto di dominio di e materia Papiamento, compara cu loke e scolnan cu tin Ciclo Basico ta ofrece (segun e metanan final “eindtermen”). Kiermen cu mester adapta e metanan final di Papiamento di e scolnan secundario, pa por hisa nan nivel academico. Mas cu claro minister ya mester cuminsa tuma e pasonan necesario, pa adaptacion di e metanan final di enseñansa secundario,” Ras a finalisa bisando.