Home Politics Sub Inspector y experto di trafico, Richard Kramers: Ley a stipula parkeerkaart...

Sub Inspector y experto di trafico, Richard Kramers: Ley a stipula parkeerkaart pero no ta bon regla Mester cambia ley pa privilegia chauffeur cu limitacion fisico

SHARE

 

 

ARUBA-December  Recientemente a tuma luga e seminario “Mi Wiel tambe ta conta” subrayando varios punto importante relaciona cu e tema di inclusion y adaptacion pa e comunidad cu limitacion. Algun di e puntonan cu a bin dilanti ta parkeer, infrastructura y e ley pa reenforsa esaki cu ayudo di Polis. Un partner importante di e aliansa/compromiso aki ta Polis, cu t’ey pa structura e proceso pero tambe fortalece control y sanciona esunnan cu viola e ley aki.

Richard Kramers a conta cu for di aña 2000 caba ley ta regla parkeerplaats pa esunnan cu limitacion por parkeer pero e ehecucion di e procedura den e ley ta loke falta. Ora e ehecucion wordo finalisa, Polis lo por actua contra personanan cu parkeer den e parkeerplaats pa hende cu limitacion fisico sin permiso.

 

Actualmente via un peticion adhunto cu anexo di concepto di aanvraagformulier y concepto di e parkeerkaart entrega na Ministro di husticia, tin un proceso andando pa Gobierno introduci e forma corecto con pa yega na un parkeerkaart. Por ehempel, ken lo atende y otorga un parkeerkaart. E procedura lo bay inclui un carta di dokter cu lo splica e limitacion, si e lo ta uno permanente, temporal y/o turistico pa nos bishitantenan.

Dentro di poco e lo ta regla y asina ey Polis por actua contra esunnan cu staciona den parkeervaknan destina y asigna unicamente pa hendenan cu limitacion. Esaki ta algo cu ta sosode diariamente y na tur parti di nos isla.

 

Ta bon pa remarca, cu aunke e procedura legal ainda no ta implementa, cu ya caba tin varios establecimento cu a cuminsa tene cuenta cu espacio pa hendenan cu limitacion. Den centro di ciudad por mira mas di e parkeerplaats nan aki, como tambe den sector hotelero y rond di centronan comercial.

 

A tene cuenta cu cada borchi cu pone riba nos isla mester di un decreto ministerial cu ta duna e borchi e autoridad legal. Pa haci e trabou mas facil, a presenta un “draft” di dje y a inclui den e peticion. E peticion specifico ta pa regla parkeerplaats special den area di Binnenstad/Playa cu actualmente ta cay bou di AruParking. Den henter Playa, nos tin solamente 10 parkeervak disponibel pa ciudadanonan cu limitacion fisico. A pidi Minister Romero pa amplia esaki y pa haci’e gratis. Tambe a purba atende cu e parti di infrastructura pa facilita mobilidad di e comunidad cu limitacion. Ta spera di por haya un contesta positivo riba e peticion aki y cu Polis di su banda lo para banda di e ley aki pa garantisa cu na tur momento automobilistanan ta respeta e parkeerplaatsnan destina pa hende cu limitacion fisico, asina Sub Inspector Richard Kramers a finalisa bisando.

 

###