Recientemente Glitz Casino hunto cu su empleadonan a tene nan lunch di Pasco na Tierra del Sol.
Sinta den e aire fresco hunto, a come loke ta tipicamente di temporada di fin di aña, pero tambe a probecha pa combersa, manera un gran famia, di loke aña 2018 a trece pa Glitz Casino.
E tabata un momento social, apesar cu e tabata durante dia, hopi agradabel caminda den un forma informal coleganan por a combersa cu otro, pero tambe cu nan supervisornan y demas staff di gerencia. A combersa di tur e logronan di aña, a papia riba cual ta sugerencia cu empleadonan por duna pa mehora e servicio recreativo cu Glitz Casino ta ofrece na su clientenan local y internacional. Mas ainda pasobra Glitz Casino ta e cas di e Arubianonan cu ta busca un forma pa pasa momentonan agradabel.
Loke si gerencia di Glitz Casino a priminti for di awor caba ta cu lo sigui crea campañanan atractivo den 2019 cu lo haci nan mas popular ainda, principalmente bou di e grupo di bishitantenan local. Durante discurso a enfatisa cu ta hopi agradecido na e apoyo cu bishitantenan local a bin ta dunando na Glitz Casino den e ultimo añanan y cu nan ta spera cu esaki lo sigui ta e caso den 2019. “Ta bay tin sorpresa agradabel,” a wordo bisa, bou aplauso di empleadonan.
Na e empleadonan a bay palabra di gradicimento pa tur nan aporte, sacrificio cu a wordo haci pa traha entre otro warda di anochi cu no ta algo facil, ora cu tur hende ta na cas durmiendo.
Na henter e staff y personal di Glitz Casino y pueblo di Aruba a manda palabranan di feliz dianan di fiesta y un aña 2019 yena di sorpresa, alegria y salud.