Parlamentario Endy Croes durante tratamento di presupuesto 2019 diabierna ultimo den su disertacion a saca un documento di Lotto pa Deporte data Februari 2014. Segun Parlamentario Croes tabata splica cu Lotto pa Deporte desde 2009 cu cambio di gobernacion a inicia un persecusion politico contra diferente Director y empleadonan di FLPD. Asina durante henter aña 2010 y 2011 a persigui diferente hende unda mayoria a termina cu mulitiple casonan den corte. Te cu awe Lotto no a sali bisa cuanto placa el a malgasta na entre otro companianan manera Ernst & Young y abogadonan manera Kloes y casa di Baba Herde. Ta calcula mas cu 2 miyon florin. Den combinacion cu malgastamento di placa di nos deportistanan e benta di e añanan ey a cay enormemente unda Lotto a presta na 2010 un suma di 7.5 MIYON na AIB pa operacion y na oktober 2011 Lotto na un manera urgente mester a presta un suma di 20 MIYON na CMB pa asina savalguardia operacion di Lotto y pa Lotto no a bati bancarota. Parlamentario Croes a presenta den Parlamento di Aruba un copia di un bankafschrift unda claramente por a tuma nota momento cu e 20 MIYON aki a wordo aloca riba cuenta di Lotto den luna di oktober di 2011. Tambe Croes tabata tin den su poder un bestuursbesluit data februari 2014. E bestuursbesluit aki 3 aña despues kier legalisa e prestamo di 20 MIYON. Statutonan di Lotto ta papia cla momento ta trata na prestamo di placa mester un ‘voltallig bestuursbesluit’ promer cu cualkier prestamo tuma lugar y alaves un apoderacion di Minister. Lotto na 2011 a presta 20 MIYON sin un bestuursbesluit y alaves sin un apoderacion di e minister concerni manera Statuut ta prescribi. Pues un acto totalmente ilegal. Despues momento cu esnan cu ta Audit Lotto a trece e remarke di e documentonan cu no ta na cuadra, pa ta exacto Februari 2014 a yama un reunion pa firma un bestuursbesluit alrespecto. Parlamentario Endy Croes ta rechasa totalmente e forma di proceder di Lotto y awe e mesun tiponan aki tin Lotto atraca unda e minister nobo cu dificultad por cristalisa su vision. Cu prueba den man Parlamentario Endy Croes a trece esaki dilanti pa pone Parlamento e instancia mas halto di Pais Aruba na haltura di maniobranan ilegal den Lotto pa Deporte. Parlamentario Croes a splica tambe cu Parlamento di Aruba lo haci peticion oficial na Algemene Rekenkamer ARA pa haci investigacion pronto den Lotto. Pues aña 2019 lo habri cu hopi desaroyo alrespecto Lotto.