Manera conoci, gobierno di Aruba recientemente a anuncia cu entrante 1 di januari 2019 lo cuminsa prohibi uzo di plastic di solo uzo y productonan di oxybenzone como tambe styrofoam. Esaki sigur ta un noticia sumamente positivo habriendo caminda pa un futuro hopi mas sostenibel pa nos isla. Parlamentario Daphne Lejuez a presenta algun pregunta den parlamento na Minister encarga cu Medio Ambiente en cuanto e topico interesante aki.
A tuma nota di e noticia sumamente positivo cu pa 1 di januari 2019 lo cuminsa cu introduccion di un prohibicion di uzo di productonan di plastic di “single-use” (manera cups, straw etc), productonan di styrofoam, y productonan sunblock/suntan cu ta contene Oxybenzone cu ta dañino pa nos medio ambiente manera entre otro coral y nos bida marino. Parlamentario Daphne Lejuez a trece dilanti den parlamento si Minister lo por duna Parlamento un update di e detayenan di e prohibicion aki? “Kico e ta encera, con e lo wordo ehecuta y controla den anticipacion di e ley, mirando cu e ley ainda no a yega Parlamento?”
Parlamentario Lejuez a puntra ki tempo Parlamento lo por ricibi e ley cu ta specifica e detayenan di e prohibicion aki, pero tambe e sanccionnan cu lo wordo aplica, pa asina companianan cu ta bende y importa e productonan aki actualmente por adapta y reemplasa nan inventario cu productonan cu no ta riba e lista di prohibicion pa 2020.
Milieuwet, Beach Policy y Turtuga
Den cuadro di Medio Ambiente, lo a keda di introduci un “Milieuwet”, parlamentario Lejuez a puntra riba e status di e ley aki y pa ki tempo Parlamento por spera di ricibi esaki pa e wordo trata tambe. Ora di otorga tereno comercial, companianan mester entrega un estudio di e impacto na medio ambiente (milieu effecten rapportage – MER) cu nan proyecto lo por tin. Na Hulanda por ehempel, ta existi un comision di experto independiente (MER commissie) cu ta revisa y evalua e estudionan aki. Parlamentario Lejuez kier sa kico lo ta e proceso pa garantisa cu e estudionan aki lo haya e atencion di experto pa sigura cu nos medio ambiente ta wordo protegi y cu e proyectonan aki ta di un indole sostenibel. “Mirando cu nos medio ambiente, flora y fauna ta recursonan fragil cu merece nos atencion y proteccion pa sigura cu esakinan lo keda den existencia pa generacionnan den futuro”, parlamentario Lejuez ta enfatisa.
Pa locual ta trata proteccion di por ehempel Turtuganan, cu ta un especie protegi mundialmente, y cual cantidad, segun observacionnan haci, cu ta subi nos beachnan pa pone webo a cuminsa bira menos. a puntra tambe con ta bay percura pa proteha nan den cuadro di Beach Policy y Milieuwet. Y esaki mirando e desaroyo di barnan y precarionan otorga por ehempel riba Eagle beach, cu ta un zona popular unda turtuga ta pone webo, lo por crea un obstaculo pa e turtuganan subi e beach pa pone webo. “Ki tipo di maneho lo bay introduci pa hustamente stimula un cantidad mas grandi di Turtuga pa pone webo riba nos beachnan? Algo cu cu alabes tambe ta un atraccion turistico y cu ta fit den e cuadro di desaroyo sostenibel?”, parlamentario Lejuez a puntra den parlamento.