ORANJESTAD – E cabesante y maestronan di Fatima College hunto cu representantenan di Aruba Tourism Authority tabatin un secreto grandi bon scondi pa e alumnonan di e school y tabata manera un explosion di alegria ora cu e alumnonan a haya e bishita inespera mainta trempan di tripulantenan di Caribbean Princess y Santa Claus.
Santa Claus y su ayudantenan a cana drenta e school cu nan mannan yen di regalo y asina e alumnonan a topa nan cu hopi alegria. E gerente encarga cu recursonan humano pa e crucero Caribbean Princess a splica cu esaki ta su prome bishita na Aruba y el a goza di e reaccion. El a sigui bisa cu p’e, e Holiday Gift Project di Florida Caribbean Cruise Association (FCCA) ta un experiencia fantastico, mirando e caranan contento di e alumnonan. Ademas, e tawata un momento unico pa comparti cu e comunidad di Aruba.
Kimberley Richardson y Marouska Heyliger di Aruba Tourism Authority a percura pa e proyecto sali exitoso y a hiba palabra di gradicimento na e tripulantenan di Caribbean Princess.
E proyecto riba su mes ta existi mundialmente ya pa mas cu 20 aña.
Tur isla cu e cruceronan di FCCA ta bishita, conoce e ‘Holiday Gift Project’ y esaki ta un di e gestonan di parti di FCCA pa expresa nan gratitud na e comunidadnan cu ta brinda hospitalidad na nan huespednan y ta coopera cu tur e liñanan crucero cu ta miembro. Na cada waf, e tripulacion di diferente barco di FCCA a entrega mas cu 200 regalo hunto cu Santa Claus durante nan bishita na un instancia, organisacion of school.
Cada aña ta scoge un diferente instancia, fundacion of un school, y cada school lo haya nan turno. E aña aki a toca turno pa Fatima College na Dakota.
E cabesante di Fatima College, Franklin Richardson, a bisa cu ta prome biaha cu Fatima College ta ricibi un bishita asina y nan a dicidi tambe como team pa mantene e evento un secreto pa e muchanan. “Mi mes tampoco a spera asina hopi cos bunita.” el a expresa.
E team y e alumnonan di e school, cu a ricibi e sorpresa cu masha entusiasmo. Cabesante di e school a finalisa bisando cu e tabata un experiencia inolvidabel pa e muchanan, pero tambe a haci un impresion grandi riba e team completo di Fatima College.