Parlamentario Endy Croes kende porcierto tabata hopi skerpi den su disertacion durante e promer ronda tratando presupuesto di Minister Dangui Oduber di Salud, Turismo y Deporte, a trece un mocion dilanti alrespecto lo siguiente. Desde añanan atras a bira un exigencia di e tempo aya Subsidie Commissie y actualmente Stichting Subsidie Commissie pa Federacionnan bira mas profesional den e sistema di prepara atletanan y un di e condicionnan ta cu mester traha cu plan di entrenamento pa por bin na remarke pa un seleccion ricibi fondo. Den e mesun plan aki Subsidie Commissie tabata procesa peticion pa cualkier entrenador profesional di exterior y ta paga tur prima y salario y e Federacion ta haya asina un entrenador cu lo entrena no solamente nos atletanan pero lo percura pa traspasa su conocemento pa entrenadornan local. Recientemente a bin un cambio den Art 30 inciso 4 di Subsidie Regeling unda e Federacion mes mester percura pa procesa tur permiso etc. Parlamentario Endy Croes a splica den sala di Parlamento cu Federacionnan ta traha boluntariamente y ta despues di ora di trabao ta hinca hopi ora y tempo balioso den diferente trabao boluntario pa deporte. Tambe e caminda pa cana y exigencia pa Federacion ta bira demasiado. Den e mocion presenta a urgi Minister pa yega na un acuerdo cu Stichting Subsidie Commissie den cuadro di vision di Minister pa haci un cambio na Art 30 inciso 4 y asina laga Stichting Subsidie Commissie haci e peticionnan pa entrenadornan internacional y cu minister lo aporta den agilisa e proceso pa por logra esaki. Parlamentario Croes ta splica cu Stichting Subsidie Commissie tin empleadonan den funcion y tin e plataforma hustamente pa sostene e Federacionnan y ta kere cu e cambio aki lo trece un alivio pa tur Federacon. Desde dia 10 di december a cuminsa trata presupuesto 2019 tur dia desde 8’or am te den oranan di anochi y ta premira pa yega na votacion riba e mocionnan y presupuesto rond di diaranson awor. Asina cu e mocion aki ricibi sosten di Parlamento di Aruba e Minister concerni por cuminsa cu e combersacionnan necesario pa logra esaki ya caba pa cu aña 2019, Croes ta termina splicando.