ORANJESTAD – Durante segundo tanda di tratamento di presupuesto 2019, cu atencion riba e ministerio di Infrastructura y Medio Ambiente, parlamentario Daphne Lejuez di fraccion MEP a haci e siguiente preguntanan hunto cu entrega di un mocion.
Parlamentario Daphne Lejuez a presenta un mocion siman pasa cu ta urgi gobierno pa presenta dentro di 6 luna na Parlamento un solucion a base di ley contra e practica di haci negoshi cu tereno erfpacht, cu ta propiedad di pais Aruba, por medio di e companianan priva cu ta bende nan accionnan, sin cu a desaroya e tereno conforme e proposito pa cual el a wordo pidi p’e na prome luga.
“Mi kier a gradici Minister pa su contestanan y pa e transparencia riba maneho di tereno por medio di publica esaki riba website di DIP.aw cu ta haci esaki tambe accesibel pa tur ciudadano”, segun Parlamentario Daphne Lejuez. Parlamento a pasa door di e foyeto riba dip.aw, na unda ta describi e maneho di otorgamento di tereno comercial “Optie ten behoeve van projecten voor commerciële, toeristische en industriële doeleinden” y a nota cu ta menciona cu bou di ‘Duur Optie” cu “De optieperiode is in principe zes (6) maanden.” Esaki ta nifica cu por desvia di e optieperiode por medio di un ministeriële beschikking y cu e por ta menos, pero tambe mas. Parlamentario a trece dilanti den parlamento, si Minister por duna un ehempel bou cual circumstancia lo por desvia di e optieperiode di 6 luna aki mirando e uzo di e palabranan “in principe”?
Maneho di Beach policy
Pa loke ta trata Beach Policy – e parlamentario a puntra si tin estudio cu ta sostene e maneho aki en bista di su posibel efecto riba medio ambiente? “Pues, tin un milieu effecten rapportage independiente traha cu ta sostene e maneho di Beach Policy y ta algo cu e stuurgroep cu a traha riba e maneho aki a inclui den nan investigacion? Den caso cu esaki no a forma parti di e investigacion, ta algo cu Minister ainda por percura pa wordo traha pa un instancia independiente?”, parlamentario Lejuez a subraya.
Minister a splica cu lo introduci Milieuwet den fase, y lo cuminsa cu e parti cu ta trata desperdicio. Un desaroyo positivo cu ta haci un inicio na e milieuwet y kier introduci esaki den fase pa por cuminsa regula lo mas antes posibel. Mirando esaki, parlamentario Lejuez tambe a puntra Minister si kizas e introduccion den fase lo por crea situacion bou cual otro aspectonan di proteccion di medio ambiente, cu por ta relevante pa e procesamento di desperdicio, lo no wordo inclui, mirando cu esakinan apenas lo wordo trata den un fase despues di esaki, y asina aki, no intencionalmente, lo por crea posibel exoneracion den proteccion di medio ambiente?
Otro puntonan importante
Pa loke ta trata e cobransa di Serlimar, parlamentario Lejuez a enfatisa cu e punto aki no ta trata si ta contra un compania estatal, pero mas bien trata di proteha e derecho y libertad di cada ciudadano pa por tin e opcion di escogencia. “Bisando esey, mi lo kier reitera mi punto di bista, pues cu e ciudadano no mester paga dobel pa motibo di haci e escogencia aki y paga dobel pa procesa sushi, pues un bes na e compania cu ta busca esaki y cu ta percura pa e wordo procesa na Serlimar, y tambe un biaha mas apart na Serlimar pa procesa”, parlamentario Lejuez ta remarca.
E parlamentario ta sigui splica cu kizas un solucion elegante por ta cu tur otro compania cu ta piki sushi tin e obligacion pa entrega esaki na Serlimar, asina aki sigurando cu e fenomeno manera menciona pa Minister di tira esaki den mondi ta wordo elimina. “Paso mi no ta kere cu ta Minister su ponencia cu tur compania ta tira sushi den mondi. Na final di dia mi ta para pa e derecho di escogencia di e ciudadano y no pa e sali perhudica pa su escogencia”, segun parlamentario Lejuez.
E parlamentario ta enfatisa cu na ningun momento ta purba implica cu Serlimar no mester haya su fair share, pero mas bien sigura cu si no ta e ciudadano, sikiera e compania of esun cu a piki e sushi tin e obligacion pa entrega y paga esaki na Serlimar y di e forma aki sigura tambe cu Serlimar ta haya e entrada necesario pa e por opera y haci su trabou. Pa conclui, parlamentario Lejuez a gradici Minister pa su splicacion en cuanto e benta di shares den companianan cu tin opcion of erfpachtsrecht y e accion pro-activo den su maneho pa inclui esaki den actanan nobo como condicion. Y como tal, parlamentario Lejuez a introduci un mocion sosteniendo e trabou di Minister pa por ancra esaki por medio di un base legal, pa garantisa e eliminacion di e practica aki tambe den futuro.