Home » Gabinete Wever-Croes: Logronan Positivo “NOS META TA CREA PROGRESO Y BIENESTAR PA TUR CIUDADANO DI NOS PAIS”

Gabinete Wever-Croes: Logronan Positivo “NOS META TA CREA PROGRESO Y BIENESTAR PA TUR CIUDADANO DI NOS PAIS”

by Admin
0 comment 58 views

 

 

 

 

 

Resumiendo un otro siman exitoso tras di lomba, Pa Gabinete Wever-Croes, e siman a trece aire fresco pa nos pueblo. Nos a realisa logronan importante pa bienestar di nos pais. Prome Minister Evelyn Wever-Croes a enfatisa cu e meta di Gobierno di Aruba ta pa crea un miho Aruba pa tur ciudadano na Aruba.

 

Parlamento a aproba e presupuesto di Crisis Plan Social unanimamente sosteniendo asina e vision di nos Gobierno pa pone e ser humano central y pa bringa problemanan social.

 

Aparte di esey, Gabinete Wever-Croes a presenta e Presupuesto Supletorio pa 2018 na Parlamento sin un deficit adicional, algo unico y hopi positivo considerando cu ultimo 8 añanan tabata tin deficitnan adicional di hasta 210 miyon florin!

 

Pa defende e Presupuesto Supletorio 2018, Prome Minister a prepara un relato anual di su ministerio di Asuntonan General, Integridad, Organisacion Gubernamental, Innovacion y Energia. Tambe algo unico mirando cu nunca antes a wordo entrega un relato anual asina.

 

Prome Minister a reuni cu Secretario General di Caricom pa explora mas cooperacion di Aruba cu paisnan di Caricom, pa asina trece mas progreso y bienestar pa nos ciudadanonan.

 

Diahuebs ultimo a tuma luga na Aruba e conferencia di “Planetary Security, Climate and Security in the Caribbean Region” organisa pa e organisacion internacional encarga cu calamidad, CDEMA y Center of Excellence na Aruba. E hecho cu CDEMA a scoge Aruba como sede di e conferencia, ta mustra cu poco poco pero sigur e confiansa internacional den Aruba ta wordo restableci.

 

Diaranson ultimo Minister di Cultura Xiomara Ruiz-Maduro a entrega un Reconocemento na Grupo di Betico, durante e gran celebracion di 50 aña di existencia y mes momento a gradici Grupo di Betico pa mantene e tradicion familiar bibo.

 

Dia 11 di december a realisa clausura di aña di papiamento na Biblioteca Nacional cu e presentacion di e publicacion di e Evangelio segun Lucas den Papiamento di Aruba. Na final a dispidi cu nos Dande tradicional.

 

Den cuadro di sigui optimalisa e siguridad di nos frontera, e siman aki Minister di Husticia Andin Bikker den nomber di Gobierno di Aruba a presencia yegada di 4 boto di patruya specialisa pa Kustwacht, e asina yama Metal Sharks. E tipo di botonan aki cu tin cabina amplio y ekipo moderno y sofistica, ta wordo uza por ehempel pa Coast Guard Mericano.

 

E tratamento di presupuesto 2019 a cuminsa siman pasa y lo finalisa e siman aki. E deficit ta 25 miyon florin cual ta hopi miho cu aña anterior cu tawata 149 miyon florin. E ta den margen di palabracion cu Hulanda, y gastonan a baha. Lamentablemente e gastonan di interes den 2019 lo ta 230 miyon florin y Hulanda a nenga di yuda nos baha e interes. Hecho ta cu si e debe no a wordo redobla pa e gobierno anterior den ultimo 8 aña, nos gastonan di interes lo no ta asina halto. Pero Gabinete Wever-Croes a tene cuenta cu ne den presupuesto y asina mes lo baha e deficit. Cu e presupuesto aki nos ta cuminsa pone Aruba bek riba e rumbo financiero corecto y cu e confiansa di pueblo y cu poder di Dios nos lo logra.

 

Finalmente, e leynan di Reforma Fiscal a wordo finalisa y ta na caminda pa Parlamento pa wordo trata pa bira ley prome cu fin di aña. Cu e Reforma Fiscal entrante 1 di januari 2019 30 mil hende no ta paga loon ni inkomstenbelasting mas, di cual mayoria ta pensionado, pa 25 mil persona di clase trahador y clase media e tarifa ta baha, 12 mil persona lo no paga grondbelasting mas, y pa 16 mil hende e tarifa grondbelasting ta bay baha. E Reforma Fiscal lo trece alivio y espacio financiero necesario den tur cartera.

 

“Cu e mesun Fe y Optimismo cu nos a traha pa logra tur esaki, nos lo drenta e siman nos dilanti. Nos meta ta crea progreso y bienestar pa tur ciudadano di nos pais y ami lo no descansa te ora logra esey”, Prome Minister Evelyn Wever-Croes a enfatisa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio