Home Police   Cu dedicacion pa nan trabou Promocion y celebracion na Cuerpo...

  Cu dedicacion pa nan trabou Promocion y celebracion na Cuerpo Policial ARUBA

MACUARIMA, ARUBA: Na Centro di Husticia na Santa Cruz a tuma lugar entregamento di decreto gubernamental. Alto comisario di Cuerpo Policial Aruba Sr. Andrew Hoo den presencia di famia y coleganan a haci entrega di promocion y tambe hubileo na 4 persona cu awe ta sigui avansa den nan carera den nos organisacion policial.

25 aña pasa ela tuma un paso nobo y 25 aña despues nos ta mira su progreso y dedicacion den nos organisacion policial. Un persona cu bo ta scucha ora bo yama na warda di polis na Oranjestad. Sra. Judith O. Britten den su funcion como telefonista ta semper cu un smile pa atende tur persona na bali di Oranjestad y su coleganan cla pa yuda y duna un man ta celebra su 25 aniversario.

Sr. Glenn E. van Nes. Sr. van Nes a wordo promovi for di Brigadier 1ste klasse pa Hoofdagent. Un paso grandi pa su carera policial. Awor cu mas responsabilidad Sr.van Nes ta cla pa sigui sirbi su pais den un posicion nobo awor como Hoofdagent.

2 persona cu ta forma parti di nos organisacion policial no ta cara desconoci. Ta trata aki di Sra. Caroline M. Peterson y Sra. Sue-Ann C. Schwengle nan ta “Senior Recherche assistent Commies” na districto di San Nicolas y Santa Cruz. Nan ta un di e personanan importante den nos departamento di recherche cu nan sosten y inteligencia awe nan ta ricibi nan promocion gubernamental.

Alto comisario Hoo ta sumamente satisfecho di mira coleganan den nos organisacion policial ta sigui avansa den nan carera of ta celebra nan aniversario dedicando nan pasion pa sirbi nos comunidad. Aruba por ta orguyoso di mira personanan studia cu ta traha pa nos pais cu alma y curason pa un mira un Aruba su seguridad na un nivel halto.