Home » KICO TIN PRIORIDAD AWOR CANNABIS MEDICINAL Y RECREACIONAL OF E SITUACION SOCIO-ECONOMICO??

KICO TIN PRIORIDAD AWOR CANNABIS MEDICINAL Y RECREACIONAL OF E SITUACION SOCIO-ECONOMICO??

by Admin
0 comment 56 views

 

 

E tabata di spera cu lo a yega e momento cu e discusion di cannabis medicinal y recreacional lo a bay exigi atencion special di esnan cu ta conforma e gobierno di coalicion POREDmep y riba diabierna 14 di december e bom a explota. Durante tratamento di e presupuesto di Salubridad den Parlamento, parlamentario Ricardo Croes di RED a hay’e den un discusion formal cu parlamentario Tevreden di MEP encuanto legalisacion di cannabis. Partido RED, cumpliendo cu nan promesa principal di campaña, a organisa un conferencia internacional, aparentemente cu placa destina pa enseñansa. Y cu un invitado cu tin su lazonan estrecho cu e.o Farc y e gobierno Chavista.

Partido RED sinembargo a lubida cu esun responsabel pa legalisacion di cannabis ta e minister di Salubridad y parce cu su partido MEP no ta cla ainda pa tuma e paso aki.

 

Durante e debate politico di Camara di Comercio na augustus 2017, ami como lider di UPP a pone bon cla cu como partido nos lo ta pro pa un eventual introduccion di cannabis medicinal, pero cu nos ta basta skeptico mirando cu tin hopi pregunta pa contesta ainda. Esaki mi a bisa, saliendo for di experiencia propio usando cannabis oil, pero cu den mi caso no a duna e resultado priminti. UPP e expresa tambe cu cannabis recreacional lo NO conta cu nos apoyo y den esaki nos por bisa cu nos ta sostene e punto di salida di parlamentario Hendrik Tevreden. Loke si nos no ta spera cu atrobe, mescos cu den e caso di dump, Serlimar, LTU y Swiss Model, e parlamentario lo para bira simpelmente un “tiger di papel”.

 

UPP ta sostene un eventual introduccion di cannabis medicinal, pero si cu condicionnan estricto. Esta cu tin estudionan cientifico cu wordo haci cu realmente ta demostra e efectonan di e medicina, por lo menos como un sedante contra dolor. Tambe nos ta exigi regulacionnan estricto na momento cu esaki wordo permiti y na unda cu e productor di cannabis medicinal ta wordo controla y cu tin aprobacion di instancianan/agencianan renombra y cu autoridad, prome cu e medicina aki yega na e pashentnan. No por ta e intencion cu djis ta bay legalisa uso di cannabis como un tratamento medico y cu na mes momento e uso recreacional ta haya un capa pa wordo usa libremente. Pues pa UPP regulacion di uso y produccion ta importante, pa mañan nos haya cualkier curandero ( “kwakzalver”) ta purba di traha su mesun remedinan di cannabis, sin cu e tin e background profesional di un boticario of farmaceutico. Loke actualmente ta e caso caba aki na Aruba.

 

Na final UPP lo kier a sugeri pa basa e discusion riba criterionan y pruebanan cientifico di uso di remedi di tera prome, pasobra den nos concepto cannabis mester wordo considera un producto di medicina alternativa. Un estudio imparcial lo por tin como resultado un lista di loke ta permisibel cu na su turno lo por wordo cubri dor di AZV. UPP sinembargo no por comprende e motibo pakico ta pone tanto enfasis pa bulldoze legalisacion di cannabis, principalmente si nos tene na cuenta e problemanan socio-economico grandi cu ta asotando nos pais. Tur esfuerso y particularmente fondonan cu aparentemente no tin, mester wordo dedica na busca reduci e debe astronomico cu e gobierno di AVPOR a laga atras, mehora e situacion social penibel y stimula nos economia, pasobra cannabis lo no yena e stoma di nos pueblo.

 

Booshi Wever

Lider UPP

Brazil 163

Aruba, 15 december 2018

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio