Home » Parlamentario Sue-Ann Ras (MEP): “Ta inaceptabel cu no a haci niun investigacion nacional riba e problematica di uzo di droga for di 1997”

Parlamentario Sue-Ann Ras (MEP): “Ta inaceptabel cu no a haci niun investigacion nacional riba e problematica di uzo di droga for di 1997”

by Admin
0 comment 74 views

 

 

Durante tratado di presupuesto di Minister Dangui Oduber, specificamente riba e cartera di Salubridad Publico, Parlamentario Sue-Ann Ras (MEP) a trece algun preocupacion dilanti. Den minister su intencionnan politico tocante Salubridad Publico, el a indica cu lo pone mas enfoke riba nos hobennan, specialmente riba programa preventivo pa loke ta trata droga, alcohol y relacion sexual.

INVESTIGACION DI 1997

“Varios di nos problemanan social tin relacion directo cu e stakeholders di salubridad publico. Pa cuminsa, mi ta puntra mi mes, con por ta posibel cu for di 1997 no a haci niun investigacion mas riba uzo di droga en general na Aruba, unda a indica cu 13 mil hende ta uza un of otro substancia di droga. Ta inaceptabel, cu a pasa 20 aña y niun minister despues, por a tuma iniciativa di haci investigacion tocante uzo di droga na Aruba. Un investigacion sigur despues di 5 aña tabata na su lugar, pa haci comparacion y analisis di e situacion y asina traha hopi mas preventivo y structura, pa ataca e problema aki na su rais,” Ras a cuminsa na indica.

INVESTIGACION BOU DI HOBEN

Segun Ras tin un investigacion si haci, pero solamente bou di e hobennan y te cierto edad, esta e Youth Health Survey (2012), bou di e hobennan di 12-19 aña y e ta remarca si, cu e resultadonan ta preocupante. “Biniendo di veld di enseñansa, mi por comparti masha hopi experiencia tocante e topico aki. Specialmente con mas y mas nos hobennan ta cay den e abismo di uzo di droga y alcohol y hopi biaha ta pa falta di informacion, educacion preventivo y problema social na cas, sin laga afo, cu miho ehempel, nan no sa tin tampoco”, Ras a expresa.

E investigacion ta papia di un total di 724 alumno di 12-19 aña di scol secundario, unda a puntra nan tocante uzo di droga y alrededor di 18% di nan a indica di ta uza droga y a cuminsa cu marihuana. Loke ta un preocupacion y problema, cu sigur mester haya atencion debido, ta e motibonan cu nan a duna. E motibo principal cu e hobennan (ambos sexo) a cuminsa uza droga of alcohol, tabata primeramente pa curiosidad (42.1%), sigui pa e di dos motibo cu nan kier ‘have fun’, pues diberticion (24.8%) y finalmente cu nan kier sinti miho (14.4%). “Como mayor y educador, semper mi ta conseha, pa conoce e amistadnan di bo yiunan, paso segun e investigacion, 1 for di 10 adolescente a indica, cu nan amistadnan tabata esun cu a influencia nan pa uza droga”, Ras a enfatisa.  

Banda di e datonan aki, no por laga afo tambe e aspecto di uzo di alcohol bou di e hobennan. Un total di 70% di e hobennan, cu ta bay scol entre 12-19 aña, a indica cu nan a purba alcohol caba, di cual un tercera parti di adolescente, cu a purba alcohol pa prome biaha, tabata entre 13-15 aña. “Ta preocupante cu 1 for di cada 10 adolescente a indica, cu nan a purba alcohol, ora nan tabatin 10 aña of menos,” Ras a bisa.

 

RELACION SEXUAL BOU INFLUENCIA

Relevante pa tambe sa ta cu casi 30% di adolescente 14 aña y 1 di cada 10 adolescente di 12 aña, a uza alcohol of droga, prome cu tene relacion sexual. Segun Ras; “Nos adolescentenan ta exponi na comportacion riesgoso y na un edad sumamente jong. E uzo di alcohol y droga, prome cu sex a aumenta barbaro, mescos cu e edad di e adolescente y mester cuminsa traha hopi mas riba programa preventivo nacionalmente.”

 

FONDO DISPONIBEL

Den Social Crisis Plan tin un fondo di 2.3 miyon disponibel pa ehecuta plan di accion pa entre otro e aspecto aki. Na januari 2019 lo inicia un investigacion pa traha mas directo na e problema, unda e FACT-team lo percura pa traha intensivamente y den colaboracion cu psikiatria pa mucha, hoben y adulto, cuido di hoben, cuido di adiccion y otro partido.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio