Diabierna durante un reunion publico den sala di parlamento tratando e presupuesto di Minister Dangui Oduber di Salubridad Publico, Turismo y Deporte, parlamentario Shailiny Tromp-Lee a cuminsa na elabora riba e parti di deporte y esaki pa loke e rebibamento di Weganan di Reino. El a trece padilanti cu pa 7 aña el a fungi como presidente di Stichting Koninkrijksspelen Aruba SKA y tambe cu el a forma parti di e directiva di Stichting Koninkrijksspelen voor de Jeugd representando Pais Aruba. E stichting aki tabata esun encarga cu e coordinacion total di tur e Weganan di Reino.
Echo ta cu e Weganan di Reino den pasado a demostra di tin un valor inmenso pa e desaroyo deportivo aki na Aruba. E weganan tin como meta pa fungi como catalisado pa reenforsa desaroyo di talento deportivo. Tambe e weganan ta crea posibilidadnan valioso riba tereno di guia y coaching. No solamente e condicionnan pa cu e preparacion ta haya atencion pero tambe e infrastructura deportivo caminda nos veld y facilidadnan ta keda manteni y renoba.
Pa loke ta e dos fundacionnan, te cu awo sra. Tromp-Lee no ta mira mucho cambio den Fundacion Lotto pa Deporte (FLPD) y Fundacion Facilidadnan Deportivo (FFD). Ta p’esey e ta desaproba e maneho hiba pa FLPD y FFD pa loke ta trata mantencion y maneho di e diferente facilidadnan deportivo y e falta di inversion en general den deporte. Mayoria di e facilidadnan deportivo cu ta den man di FLPD of FFD ta den un estado penoso. Un ehempel palpabel ta nos dos veldnan di yerbe di futbol. Frans Figaroa tabata cera casi 1 aña pa motibo di luz. Y Guillermo Prospero Trinidad ta den un estado hopi alarmante.
Pa loke ta trata e cambio di statuut di FLPD cu den pasado semper a rekeri aprobacion di e minister di deporte, sra. Tromp-Lee kier sa si e cambio aki cu a tuma lugar net durante cambio di gobierno y si esaki a sosode a base di aprobacion oficial di e minister saliente. Den pasado, bou Minister Ramon Lee su periodo, a cambia e statuut di FLPD caminda a agrega cultura bou di e fondo manera e tabata inicialmente tempo a institui FLPD pero cu den transcurso di tempo a keda kita pa AVP. Pueblo mester haya sa si AVP su deseo enberdad tabata pa Gobierno no tin nada di bisa den FLPD, ta bon pa pueblo haya sa si AVP tabata kier y ta sostene e malmaneho di FLPD. Sra. Tromp-Lee ta haya cu tabata un custumber y algo masha normal ora tin cambio di Gobierno, e directiva ta keda cambia. Pero un biaha mas ta visto cu un abuso di poder a tuma lugar bou di e Gobierno di Mike Eman.
E parlamentario kier sa di minister cuanto y den kico Fundacion Lotto pa Deporte ta inverti su placa. Lamentablemente te cu awe minister no ta hayando cooperacion ni informacion di FLPD. E falta di cooperacion aki di FLPD ta un falta di respet pa e organo mas halto di nos pais y p‘esey Fraccion di MEP a presenta un biaha mas un mocion pa demostra nan malcontento pa loke ta trata FLPD.
Tambe sra. Tromp-Lee a mira den e presupuesto un subsidio di casi 3 miyon florin pa FLPD, pero e informacion cu el a ricibi ta cu e fundación aki no tabatin ni e decencia pa entrega nan Wenselijksheidsbegroting 2019. Tambe e informacion cu el a ricibi ta cu nan falta pa entrega nan activiteitenrapport, nan Jaarrekeningen 2015-2016-2017, nan Beleidsplan 2018 – 2019.
Finalmente sra. Tromp-Lee kier a haya sa di Minister si e la evalua re-introducion di Olimpiada Escolar. Un proyecto cu den pasado a demostra su necesidad y tabata masha popular.