Awe diahuebs ta tratando e presupuesto di Infrastructura den Parlamento. Un debate cu sigur ta andando pero semper tin cosnan cu no ta bay bon.
Parlamentario Arthur Dowers di AVP a splica cu a trata e presupuesto diinfrastructura. Esaki ta un presupuesto caminda cu tin un minister cu tacustuma pa manipula pueblo y manipula parlamento.
AVP a haci un peticion na su persona diaranson pa entrega documentonan cu a wordo haci por escrito na parlamento. A pidi copia di diferente documento, pasobra no a haya chens pa analisa nan bon y pa asina ey por ciega e conclusionnan si e documentonan aki ta cuadra y ta cuadra cu e contestanan cu e minister ta duna.
E minister aki a presenta den parlamento y kier cuminsa lanta un smokescreen bisando cu Dowers lo tabata responsabel pa diferente instrumento of productonan cu a disparce for di Bestuurskantoor.
Ta importante pa e minister aki siña papia berdad. Tur cos cu a sali for di despacho di Dowers, of cu a sali for di cualkier departamento pa un otro, ta documenta.
No a bay cu ningun computer for di ningun departamento. Sa cu tin departamento a haya computer for di cierto fondonan y parce cu e gobernante aki a bay cu e computernan aki, bisando cu lo ta computer cu Dowers lo a duna na departamentonan sin cu esaki tabata tin mag.
Esey tabata sin sentido, pasobra tur cos a cana conforme regla y documenta. Loke e parlamentario ta puntra su mes ta dicon nunca nan a bay check na un cierto stacion di radio, pasobra tin di compronde y hasta hendenan cu ta traha na e radio, cu tabata tin material cu a bay eynan.
E minister aki, cu ta papia riba cosnan cu a wordo hiba cas, ta e minister aki mes ta hiba cos cas y tin hende cu e mester a bay busca cosnan na su cas. Ora cuminsa tira santo den wowo di pueblo, bo mester ta sincero. Bisa pueblo cu ta berdad cu a busca material na bo mesun cas cu bo a hiba despues cu bo tabata minister.
Bisa pueblo, con cierto stacion di radio a lanta, con cierto stacion di radio a haya material y ken ta esun cu tabata administra e stacion di radio.
For di despacho di Dowers y su departamentonan, ningun hende tabata administra stacionnan di radio di ningun hende na Aruba. A traha conforme regla y a percura pa tur cos cana na bienestar di e departamentonan.
Ora cu haci pregunta, pa duna transparencia cu bo tin cu bay te abao pa bo bin crea e impresion cu lo tin cosnan cu a pasa den bestuurskantoor cu no ta klop, mester cuminsa wak den spiel den su mesun direccion.
E minister aki ta yorando den parlamento cu nan a pone luz riba diferente proyecto. Plaza Padu, Welcome Plaza, a pone luz y e luznan aki no a wordo paga.
Mester ta honesto, segun Dowers. Ken ta esun cu a core bay purba pone prome piedra na Welcome Plaza? Otmar Oduber. Ken ta esun cu a core bay Plaza Padu bisa cu ta su proyecto? Otmar Oduber. Ken ta esun cu a pasa trapa Benny Sevinger tumba, pa bay bisa cu ta su proyecto Linear Park? Otmar Oduber.
Ken ta esun cu a pone luz riba Linear Park cu nunca tabata cende? Otmar Oduber. Y awo kier bin gaña yora den Parlamento, bisando cu Benny Sevinger a sali y no a paga pa e luznan. Oduber a bira minister, e tabata tin gana di ta minister. Pesey a manipula. A bay cera un gobierno cu Evelyn Wever-Croes cu a yamabo pa corupto, a yamabo pa ladron y awe kier bin bisa cu Dowers of bin insinua cu Dowers lo por a haci algo di corupcion, pasobra lo el a manda un computer of lessenaar pa un otro departamento.
Ora cu tin un ambtenaar di polis cu mester soluciona caso di crimen cu tabata wordo cometi na hendenan liga na su mesun partido. Dowers dado momento cu a duna su propio stoel na departamento di polis, pa percura pa nan traha comodo. Semper mester hiba e lucha pa bringa contra crimen. E gobernantenan aki ta totalmente diferente.
Tin gobernante sinta awe cu nan den un aña a pasa un tercera parti di aña biahando. Ta djodjo riba placa di pueblo y awe ta bin gaña cu ta bin para na banda di pueblo.
Otmar Oduber, bo tin cu wak bo cara den spiel y mester tin berguensa pa bin papia cu luznan pa full pais Aruba a wordo plama. Awor aki e tin manera un rabia cu e pueblo aki a haya luz den nan bario pa por a reduci riesgonan di crimen, pa por aumenta siguridad, pa percura pa nos turistanan por mobilisa nan mes na un forma safe riba e pais aki. Ta grita di un miyon, pero ora ta saca un miyon pa amigonan pa diferente concierto, conciertonan pa malogra nos yiunan, ta saca dos tres miyon y hasta a yega cinco miyon, sin ningun dia, ni hik pa saca nan.
Pero pa e pueblo aki, cu tin derecho den tur bario pa haya luz pa nan por biba mas trankil, awo ta yora cu esey mester wordo paga.
E minister aki ta unda cu mester a sacrifica pa haya mas di 100 miyon florin pa por a haci e parti di turismo y tambe cu e por a haci tur e fiestanan cu el a haci. Y e mas cu tur hende mester tin berguensa pa bin papia.
E ta un di nan cu ta forma parti di gobierno. E ta un di esnan cu a gasta mas placa den gobierno, e unico cu a fiesta cu placa di pueblo, pasobra nan mester a traha sin placa manera animal den departamento di husticia, mientras cu e tabata landa den placa p’e y su amigonan sponsor. Tin cu corda cu no ta cla ainda. E bataya aki ta sigui. Cada biaha cu e bin cu mentira, AVP lo tey pa desenmascar’e. Ta yora cu AVP ta papia den prensa. Den prensa AVP por papia, pasobra prensa ta liber pa papia. Den Parlamento e palabra ta na dje pa e por oranan pa papia. Aki fo AVP por papia y comunica cu pueblo pa mustr’e ki sinberguensa e ta.