ORANJESTAD – Diasabra ultimo a tuma luga e “Kidpreneur$ Bazaar”, den Caya Betico Croes banda di ALDO.
IDEA a organisa e bazaar y e muchanan cu a participa e aña aki den e proyectonan di: “Kidpreneur$ with BIG Ideas” y “Kid$ BIZ Market” a haci e presenta.
- “Kidpreneur$ with BIG Ideas” ta un proyecto di 2 aña cu a cuminsa e aña aki 28 februari y lo termina otro aña december 2019.
Ta ofrece e proyecto n’e 9 traimerdianan na Aruba y ta destina pa muchanan di 5-de y 6-de klassen cu ta bishitando Traimerdia.
- “Kid$ BIZ Market”, a tuma luga durante e herfstvakantie (1-5 okt-2018). Y e proyecto tabata pa muchanan cu no ta bishitando traimerdia. Un total di 32 mucha a participa na e proyecto aki.
E proyectonan a ofrece e muchanan educacion empresarial cu lo yudanan reconoce oportunidadnan comercial, door di siña nan con pa gana placa ya for di un edad hopi jong usando nan mesun creatividad. Esaki nan ta haci door di haya workshop den diferente angulo, manera den arte p.e.: carchi creativo, pintamento riba canvas y con pa crea un areglo musical cu lo por genera placa. Tambe nan a siña con pa traha juice y snacks saludabel/natural. Ademas nan a haya les teoria di finansa y cada mucha a traha nan mes un business plan, di nan negoshi cu nan tin den mente.
Durante e workshopnan nos por a ripara cu cada mucha cu a participa den e proyecto, tabata hopi satisfecho y a keda motiva pa un dia nan por experiencia den un forma educativo, kico e ta pa “ta un comerciante”.
Pa e motibo aki, Iniciativa pa Desaroyo di Empresa Arubano (IDEA) ubica den oficina di Departamento di Asuntonan Economico, Comercio y Industria (DEZHI) a dicidi di organisa un “Kidpreneur$ Bazaar”, pa e muchanan aki.
E traimerdianan cu a participa e aña aki den e bazaar tabata: Traimerdia Dakota, Traimerdia Morgenster, Traimerdia Sabana Basora y Traimerdia O’stad. Otro aña e otro 5 Traimerdianan cu yega na turno lo participa den un bazaar similar.
Durante e bazaar 25 mucha a bin hunto como un comerciante ariba nan mes, y a bende diferente producto manera: cupcake, juice di lamunchi, pinturanan ariba canvas, kuki, mata, pinturanan riba boter, diferente decoracion di pasco, armband, slime etc. Mas na final di e anochi algun artistanan jong a presenta diferente cantica di pasco y tambe tur presente por a disfruta di e luznan di Pasco.
Cada mucha presente na e bazaar por a experiencia con pa ta un bon comerciante, door di comunica y ta amabel cu cliente y tambe a siña con pa duna nan producto un bon prijs pa asina por bende nan.
Tur mucha a bende hopi bon, y a bay cas satisfecho cu nan ganashi bon mereci.
IDEA ta gradici tambe tur su partnersnan manera, SETAR, Elite Promotions & Entertainment, Bureau Traimerdia, Departamento di Cultura, CEDEHM y DOW, pa e evento exitoso aki di: “Kidpreneur$ Bazaar”.
Un danki na pueblo di Aruba cu a bin duna e muchanan, cu ta nos futuro, nan aporte. Y un danki na cada mayor cu a confia den nos, y a sigui guia nan yiu pa por participa den e bazaar.
Y por ultimo nos kier a desea e muchanan cu a participa den e proyecto di “Kidpreneur$ Bazaar” hopi exito.
Abo tin un Idea? Hasi bo Idea realidad. Bishita Idea na Departamento di Asuntonan Economico, Comercio y Industria, na Sun Plaza di dos piso, y nan lo yudabo cu tur informacion y guia necesario.