Home » Como parti di campaña ‘Scoge di Curason’ DONACIONNAN DI FIN DI AñA WEB ARUBA PA 5 INSTANCIA

Como parti di campaña ‘Scoge di Curason’ DONACIONNAN DI FIN DI AñA WEB ARUBA PA 5 INSTANCIA

by Admin
0 comment 50 views

 

 

 

 

 

 

 

ORANJESTAD – E fin di aña aki un biaha mas WEB Aruba a haci donacion na diferente bon causa. E biaha aki a scoge pa haci donacion na e instancianan Fundacion pa Hende Muhe den Dificultad, Fundacion CVA, Trampolin pa Trabao y Fundacion Museo Arubano. Manera di custumber, tambe a haci e anual donacion grandi na Koningin Wilhelminafonds. E donacionnan en total a encera un suma di 43 mil florin. Diabierna ultimo a tuma lugar e otorgamento di e ‘donation cards’, durante un encuentro ameno na WEB Aruba cu representantenan di e instancianan.

 

Aunke WEB tin un maneho di donacion pa henter aña, e compania di awa y energia ta haci donacionnan special durante e periodo di fin di aña.

 

Scoge di Curason

E donacionnan special aki ta parti di e campaña interno di WEB cu yama ‘Scoge di Curason’. WEB Aruba ta pone un suma di donacion disponibel, pero ta laga empleadonan scoge con ta reparti e suma entre e instancianan. E aña aki e empleadonan a scoge pa e mayoria di e donacion bay pa Fundacion pa Hende Muher den Dificultad (Awg. 7.950,-), sigui pa Fundacion Cerebral Vascular Accident Aruba CVA (Awg. 6.525,-). Fundacion pa Trampolin pa Trabao a keda na di tres lugar (Awg. 6.150,-) y Fundacion Museo Arubano, FMA ta e di cuater instancia cu a ricibi su donacion (Awg. 4.375,-).

 

Aparte di esey, a haci e anual donacion na Koningin Wilhelmina Fonds (Awg. 18.000,-). Esaki a bira posibel pa medio di un colecta cu coleganan a haci bou di empleadonan di WEB. E donacion pues, a sali for di contribucionnan financiero di e empleadonan mes, mas e parti di donacion di e compania.

 

WEB Aruba ta aplaudi y reconoce e trabou incansabel cu e instancianan ta haci pa comunidad di Aruba y ta kere cu ta importante pa no solamente contribui financieramente, pero tambe cu trabou boluntario. P’esey ta haci un apelacion na comunidad pa yuda instancianan caritativo. Un esfuerso chikito por resulta den un gran gesto.

 

Cera Conoci cu e instancianan

Trampolin pa Trabao ta un fundacion cu ta train personanan cu un limitacion pa por participa activamente den forsa laboral di nos comunidad. Trampolin pa Trabao kier contribui na un mihor ambiente, pa encurasha comprension y respet di otronan, no obstante nan limitacion. Trahando na Trampolin pa Trabao, hende cu un limitacion ta haña experiencia di trabou y ta desaroya nan conocemento y habilidadnan social.

 

Fundacion CVA ta dirigi pa mehora y yuda mantene salud y bienestar di personanan cu a haña un atake cerebral. E Fundacion ta organisa charla, curso, training, seminario, congreso y otro actividadnan pa profesionalnan por acumula e conocomento pa por duna un servicio mas optimal posibel na e pashent na momento cu e sufri un atake cerebral. Tambe e Fundacion ta laga haci investigacionnan al caso y ta traha cu instancia y/of organisacionnan cu tin un meta igual of relata na e meta di Fundacion CVA. Ademas ta organisa charla y ta ofrece checkeo/test pa comunidad como medio di prevencion y pa conscientisa riba e importantcia di biba un bida saludabel.

 

Fundacion Museo Arubano ta un organisacion no comercial cu ta encarga cu preservacion y promocion di Aruba su herencianan natural y cultural. FMA su museonan ta aloca miles di artefacto y ta supervisa exhibicionnan, manera den e Museum of Industry y e Community Museum na San Nicolas, cu ta promove e ciudad postindustrial. E meta di FMA ta pa garantisa cu futuro generacionnan por disfruta y sigui proteha nos patrimonionan nacional.

 

Fundacion pa Hendenan Muhe den Dificultad a lanta mas cu 20 aña pasa pa guia hendenan muher y nan yiunan cu ta haña nan mes den situacionnan di crisis. Ta duna nan un dak temporal y ta guia nan pa recupera y procesa lo cual cu nan a pasa aden. FHMD ta un organisacion no comercial cu e meta pa mehora posicion di hendenan muher di Aruba, pa preveni violencia domestico y pa ofrece ayudo na victimanan di violencia domestico. Ta deseo di FHMD pa haci mas na e parti preventivo. Pa motibo di fondo, hopi biaha e parti preventivo ta keda limita na charla y conseho pa conscientisa comunidad en general y hendenan muher en particular, cu violencia domestico no ta acceptabel.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio