Parlamento a vota unanimamente pa esaki!
Durante e siman aki Parlamento di Aruba ta tratando presupuesto 2019. Durante e reunion aki un di e puntonan cu a bin na discusion ta e crisis social cu Aruba ta den dje. Parlamento den su totalidad a vota pa pasa e ley di IBSCP (Interim Begrotingsfonds Social Crisis Plan) cual ta e fondo cu ta bay carga e maneho financiero di e Crisisplan Social.
“Tur bida tin un comienso diferente, tur bida tin un final diferente. Sinembargo, tur bida tin un proposito!”, tabata palabranan cu Parlamentario Hendrik Tevreden di MEP a inicia su discurso cu ne den sala di parlamento. E parlamentario ta expresa cu e motibo pakico nos ta den un crisis social ta conoci y nos tur sa con el a culmina tambe; na un caso tragico caminda dos mucha a perde nan bida di forma cruel.
Pa parlamentario Tevreden tin diferente angulo di cual por atende e materia social. “Mi kier enfatisa cu den nos situacion actual tur angulo ta necesario pa por atende debidamente”, sr. Tevreden ta bisa. E ta splica cu ora bo nace den un situacion social menos bon, pero logra na vence e retonan pa sobresali di e circunstancia cu kier tenebo abou, e ta dunabo un afinacion mas profundo. Y e afinacion aki ta e causa cu nos ta lucha pa e bienestar di nos ciudadanonan. Parlamentario Tevreden ta contento di mira cu aunke na prome instante oposicion (AVP) den e presupuesto 2018 no a kere den e plan pa atende cu e crisis social, por a nota un cambio di pensamento y a acepta cu e crisis social ta real y cu e gabinete a tuma e pasonan corecto pa atende cu ne. E cambio di pensamento den oposicion a hiba nos na un momento historico den Parlamento di Aruba, un momento di cambio unda cu un partido cu tawata pensa contrario a cambia di pensamento y yega na un consenso (atrobe) pa bienestar di Aruba.
E realidad ta keda, cu politicamente nos no ta di acuerdo riba tur cos of tin mesun ideologia, pero ora ta trata di esnan mas fragil den nos comunidad e sentimento di mira un otro ciudadano logra pa ta e miho cu nan por ta, ta un pensamento cu ta etala riba tur ideologia partidista. “Nos por ta den diferente boto, pero nos ta riba e mesun barco”, Tevreden a remarca.
Awor ta toca turno na e Minister encarga, hunto cu e experencia di tur e profesionalnan cu a traha riba e plan pa ehecuta e plan di crisis social, pa atende cu esaki debidamente, y percura cu e rendemento ta mas halto posibel, segun Parlamentario Tevreden ta splica.
“Aruba ta riba e curso corecto pa atende cu e crisis social. E no ta bay ta un tarea facil, pero esaki ta e comienso pa nos haci e cambionan necesario.”