Home » Prome Minister Evelyn Wever-Croes: Pa Presupuesto 2018: Contrario na e Gobierno anterior:

Prome Minister Evelyn Wever-Croes: Pa Presupuesto 2018: Contrario na e Gobierno anterior:

by Admin
0 comment 53 views

GABINETE WEVER-CROES A ENTREGA PRESUPUESTO SUPLETORIO 2018 ‘BUDGET NEUTRAL’

No tin deficit adicional

 

Durante tratamento di Presupuesto Supletorio den Parlamento dialuna ultimo, Gobierno di Aruba a duna cuenta na Parlamento y a demostra cu pa 2018 no a gasta ni un cen mas di loke cu Parlamente a autorisa na prome instante. Prome Minister Evelyn Wever-Croes a entrega su Relato Anual den e reunion aki.

 

Prome Minister a duna un comparacion entre e gobierno anterior y e logro di Gabinete Wever-Croes. E Gobierno anterior di AVP cada aña a presenta deficitnan na Parlamento cu tawata varia di entre 1.8 miyon florin te na 210 miyon florin. Gabinete Wever-Croes a entrega Presupuesto 2018 sin deficit adicional na fin di aña. Esaki, Prome Minister ta considera un logro sumamente grandi.

 

Prome Minister a trece dilanti cu finansa ta hopi crucial pa e debido funcionamento di henter Gobierno. Pero mes importante y indespensabel ta tambe e control riba finansa na unda cu Parlamento ta hunga un rol hopi importante. E mandatario principal di nos pais a felicita y gradici Parlamento pa ta critico riba finansa. Ya caba na april, Parlamento a duna Gobierno aprobacion pa Presupuesto 2018 y na mes momento a indica pa Gobierno bin bek Parlamento mita di aña pa duna cuenta.

 

“E control di Parlamento ta asina importante y indespensabel pa e motibo cu nos a firma un protocol cu Hulanda cu ta significa fin di CAFT cu lo nifica tambe cu nos mes mester ta bon prepara pa nos mes por sigui cu e control na e momento cu CAFT bay y Aruba haya su autonomia financiero bek den nos man. Palabracion ta cu Aruba lo cuminsa traha riba su propio ‘Begrotingskamer’ pa asina haya su autonomia bek porlo tanto ta hopi importante pa Parlamento eherce su funcion di control”, Prome Minister a enfatisa.

 

Durante e reunion, Prome Minister a gradici tambe e departamentonan di Gobierno, Minister di Finansa Xiomara Ruiz-Maduro y Parlamento pa e trabounan grandi haci pa tene finansana ordo.

 

Den pasado, e Presupuesto Supletorio tawata wordo trata durante e ultimo dianan y te hasta oranan, di aña. E biaha aki, tres siman prome cu aña caba, Parlamento ta trata Presupuesto Supletorio. Esaki, segun Prome Minister sigur ta algo pa elogia.

 

Ademas di esaki, Presupuesto Supletorio 2018 ta ‘budget neutral’ cu kiermeen cu e no ta bin cu deficit adicional manera cu esnan di e gobierno di pasado di AVP. Apesar di tur e retonan cu Gabinete Wever-Croes a encontra y e sorpesanan adicional cu a bin durante aña origen di mal maneho di Gobierno anterior, ta un logro grandi cu asina mes a mantene Presupuesto Supletorio ‘budget neutral’ y esaki, e Premier ta expresa cu ta di elogia.

 

“Un di e sorpresanan aki ta cu mester paga 7.2 miyon florin extra na Sache, cu ta e garantianan cu e Gobierno di AVP a duna na 1987. Tambe e aña aki mester a paga 65 miyon florin na tur e proyectonan PPP y otro aña mester paga 80 miyon florin. Asina mes, Presupuesto Supletorio a keda riba e mesun suma di deficit cu Parlamento a aproba na april. Nos a encontra e retonan aki, nos a enfrenta nan y nos a busca solucion. Pasobra ta esaki ta e manera pa pone Aruba bek riba e finansa publico sostenibel y saludabel”, Prome Minister a expresa durante e reunion den Parlamento.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio