E Crisis Plan Social awo a haya e instrumento cu tawata falta legalmente pa e wordo ehecuta den tur aspecto. Pa atende cu e crisis social of tambe por bisa e exploxion social cu tin na Aruba, Gobierno di Aruba a dicidi pa pone 34 miyon florin disponibel pa dos aña. Pa haci esaki posibel Gobierno a traha un presupuesto separa for di e presupuesto di Gobierno, un ‘Interim Begrotingfonds’. Cu e fondo aki, e veld social lo haya e sosten financiero pa por adresa e temanan social.
“Cu orguyo y humildad mi ta gradici Parlamento completo, esnan cu ta sostene Gobierno y esnan di oposicion, cu a bay di acuerdo cu e Presupuesto di e Crisis Plan Social. Esaki ta un ley cu a pasa unanimante mustrando asina cu nos tur ta reconoce cu na Aruba nos tin un problema social y nos no por sigui haci mas manera cu e problema no ta existi. Parlamento completo ta para tras di Gobierno pa aproba 34 miyon florin pa un fondo special asina pa adresa e problemanan social di nos pais. Esaki ta yena mi cu orguyo y siguridad y mas confiansa cu nos lo logra crea un miho calidad di bida pa tur nos ciudadanonan, especialmente esnan mas vulnerable den nos comunidad”, Prome Minister Evelyn Wever-Croes a expresa.
Prome Minister ta considera esaki un momento hopi grandi na unda cu Parlamento unanimamente despues di debatenan largo, a aproba e fondo pa Crisis Plan Social.