ORANJESTAD – For di momento cu parlamentario Sue-Ann Ras (MEP) a drenta Parlamento y a cuminsa lesa y analisa cierto situacion social, e por a constata cu tin hopi problema social crucial, cu pa hopi aña no a haya e atencion debido. Segun Ras ta di aplaudi y sostene cu minister Glenbert Croes a tuma e rienda y acerca tur instancia gubernamental y fundacion, pa bini hunto, dialoga y bin cu e posibel solucionnan necesario. “Durante mi prome disertacion di presupuesto 2018 pa Minister di Asuntonan Social y Laboral, mi a duna atencion y vocifera cu nos tin un crisis social, sosteniendo esaki cu tur e datonan di diferente instancia y fundacion. Ora nos ta papia di crisis social, ta bon pa aclarea tambe, cu no tur cos por haya un solucion den 1 aña y no por vocifera tampoco cu no a haci nada den 1 aña, paso nos ta papia di mas di 40 instancia cu a bin hunto como tambe 4 ministerio: Salubridad, Enseñansa, Husticia y Social”, Ras a cuminsa na bisa.
Segun Ras pa Social Crisis Plan (SCP) su implementacion ta efectivo y decisivo, mester a crea un fondo di presupuesto temporario pa e periodo di 1 di augustus te 31 di december 2019. E aumento alarmante di abuso mucha na Aruba ta grandi y esey mes tabata e motibo urgente cu gobierno a dicidi pa bin cu Social Crisis Plan Integral.
PRESUPUESTO DI 34 MIYON
Pa SCP tin un suma di 34 miyon florin, mas 1 miyon florin cu a bin di Hulanda, for di e resto di Fondo di Desaroyo Aruba, cu lo ta destina specificamente pa ehecucion di e proyecto Derecho di Mucha di UNICEF. Unico condicion ta cu cada kwartaal ta duna un raportahe na UNICEF. E trayecto a cuminsa oficialmente fin di april 2018, despues di a determina e presupuesto di 2018. Despues di esaki, mesora a busca un manera, pa garantisa e medionan, pa ehecuta SCP durante e proximo 2 añanan.
PLANIFICACION GLOBAL SOCIAL CRISIS PLAN
Mas cu claro mester tin un bon planificacion pa yega na ehecucion. E planificacion global di SCP lo ta di e siguiente forma: januari te mei 2018 tabata e fase inicial pa elabora henter e Social Crisis Plan, atende y trata e cuestionnan presupuestario y proporciona tur informacion necesario na tur stakeholders. For di juni te december 2018 tabata e fase di structura e fondo (Interim Begrotingsfonds) pa beneficio di SCP y den november e ‘ministeriële beschikkingen’ relaciona cu e fundacionnan finalmente a keda cla. Na december 2018 te december 2019 lo duna ehecucion di e programa di trabou di e servicio- gubernamental y fundacionnan y finalmente duna ehecucion na e programa di UNICEF pa implementa un ‘child protective system’ den luna di februari 2019.
“Den 2019 tin 5 fecha poni pa entrega e raportahenan por escrito for di e directornan di e fundacionnan y e servicionan gubernamental: 31 januari, 30 april, 31 juli, 31 october y 31 januari 2020” Ras a indica.
COMISION SUPERVISION SOCIAL CRISIS PLAN
E Comision Supervision Social Crisis Plan ta forma pa algun miembro di Parlamento bou presidencia di miembro di Parlamento, Sue-Ann Ras, cu tambe ta miembro di e comision fiho di asuntonan social di Parlamento. Como procesmanager ta e directora actual di Departamento di Asuntonan Social, sra. Glenda Hernandez. Den e comision aki Minister di Asuntonan Social, den colaboracion cu e otro ministernan, lo duna raportahe na Parlamento tocante e descubrimentonan di e Stuurgroep Implementatie Sociale Crisisplan. E stuurgroep y e Comision di Supervision SCP ta bin cada 3 luna hunto despues cu e entrega e rapportnan y e relatonan tocante e resultadonan. Despues di revisa y discuti riba e rapportnan, lo traspasa esaki na Conseho di Minister y Parlamento.
PREOCUPACION PARLAMENTO
Segun Ras parlamento ayera a indica dos punto di preocupacion: con pa controla/supervisa cu e fondonan ta bay netamente den e plan di SCP y kico lo pasa despues di 2 aña? Pa loke ta trata e supervision y control di e fondonan oposicion a bin cu un amienda cu articulo 5 na e ley: Cu na final di cada kwartaal e ministernan en cuestion lo proporciona un informe di progreso (voortgangsrapportage), incluyendo un resumen di gasto (bestedingsoverzicht) di e presupuesto di e fondo. “Y esaki ta netamente loke cu Raad van Advies y CAft a trece dilanti tambe como preocupacion y awo e ta poni den ley y nos lo supervisa esaki den su totalidad,” Ras a finalisa bisando.