Home Politics Parlamentario Richard Arends: Gobierno a aumenta accijns cu 10 cen den porta...

Parlamentario Richard Arends: Gobierno a aumenta accijns cu 10 cen den porta di Fin di Aña

Gasolin lo mester a baha cu 21.7 cen pa liter!

 

Gobierno a anuncia cu prijs di combustibel ta baha cu un poco mas cu 15 cen entrante awe. Aumento di prijs di combustibel semper tin consecuencia cu gasto di operacion di otro companianan tambe ta subi, locual hopi biaha ta afecta otro prijsnan tambe. Esaki ta afecta consumidor directamente ademas cu combustibel ta forma un parti substancial di e gastonan mensual di cada famia. Aumento den prijs di combustibel ta bay man den man cu inflacion. Riba su mes e reduccion ta un bon noticia pa comunidad, pasobra te dia di awe Gobierno no a sa di presenta compensacion pa e perdida di poder di compra pa motibo di e introduccion di e crisisheffing.

 

Pero cu e reduccion aki Gobierno no a perde chens y a core aumenta accijns riba gasolin atrobe cu 6.5 cen y – despues di e aumento di accijns cu 2.0 cen na april y 1.5 cen na november – a logra completa e medida di aumento di accijns cu 10 cen riba gasolin y diesel na 2018. “Riba e 180 miyon caba cu nos mester carga pa motibo cu ta mantene e crisisheffing y ta aumenta impuesto como prome fase di e supuesto reforma fiscal, awor mester carga 10 miyon extra door di e aumento di accijns riba combustibel,” Parlamentario Richard Arends a splica.

 

Prijs di crudo ta wordo determina riba mercado internacional y nos no tin ningun influencia riba esaki, Arends a enfatisa, pero un biaha mas a Gobierno a aumenta accijns y a kita en total 10 cen di e reduccion cu tabata toca pueblo. Esaki a bin como un berdadero “bonus” di Fin di Aña pa comunidad. E unico cos ta cu Gobierno a sconde e aumento den e reduccion cu Aruba ta probecha di dje a base di prijs internacional di petroleo.

 

Minister Xiomara Ruiz-Maduro ta bisa cu for di aña 2007, ex-Minister Nilo Swaen a baha accijns cu 10 cen pa liter, debi na aumento drastico e tempo ey riba prijs di combustibel internacional. Durante Gobierno di AVP tur Minister di Asuntonan Economico tabatin e opcion di coregi e maneho. “Minister Michelle Hooyboer no a mishi cu e tarifa di accijns durante 4 aña largo, ni tampoco Minister Mike de Meza y ni mi mes tampoco,” ex-Minister Arends y awe Parlamentario a bisa.

 

E accijns como tal no a haci falta di dje nunca den caha di Gobierno. Awor na aña 2018 – 11 aña despues cu a bah’e – diripiente kier his’e bek y Gobierno a opta pa haci’e na porta di Fin di Aña. “Gobierno no por papia di coreccion di maneho. Despues di 11 aña ta simplemente un maneho nobo: un medida di 10 cen cu nos lo sinti otro aña,” Parlamentario Arends a splika.

 

Parlamentario Arends ta lamenta cu ora prijs di combustibel riba mercado internacional baha, Gobierno a bira hinca un medida di 10 cen y no ta pasa e reduccion completo pa nos comunidad. Cu e aumento di accijns aki 50% di e prijs cu nos ta paga na pomp di gasolin ta bay straight den caha di Gobierno via accijns y BBO/BAZV.