ORANJESTAD, Aruba: Minister di Asuntonan Social a bin Parlamento e siman aki pa porfin presenta e ley cu ta formalisa establecimento di e fondo temporario cu lo maneha di manera efectivo e Sociaal Crisis Plan. Na varios ocasion Fraccion di AVP a trece e punto aki dilanti y ta lamenta cu a tarda asina tanto pa presenta e ley aki. Gobierno a pidi na september caba pa Parlamento duna su ‘bendicion’ pa e por cuminsa usa e fondonan. Sinemabrgo, fraccion di AVP no kier a duna un “carte blanche” hustamente pa e mesun motibonan cu CAFT y Raad van Advies a trece dilanti. E organonan aki tabata mira riesgonan pa claridad, transparencia y e poder di controla cu Parlamento tin pa asina garantisa ehecucion corecto di e plan aki.
Minister a duna un splicacion riba esaki, pero fraccion di AVP a propone un amienda. Parlamentario di fraccion di AVP, Sr. Richard Arends, a expresa cu e amienda presenta door di fraccion di AVP y aproba door unanimamente door di Parlamento, minister tin e obligacion di presenta cada cuartal, mescos cu presupuesto, un informe riba ehecucion di e Sociaal Crisis Plan como tambe duna splicacion riba e gastonan y uso di e fondonan.
Cu e cambio aki e posicion di Parlamento ta wordo fortifica, pero ta cubri e preocupacion nan cu Raad van Advies a trece padilanti como tambe e colegio di supervision financiero pa loke ta trata e transparencia y claridad . Awor Parlamento por mira precies unda y con ta haci e gastonan, unda ta aloca e fondonan, pero tambe ta fortifica e posicion di Parlamento como organo di control pa loke ta trata fondonan publico.