Durante tratamento di presupuesto di Ministerio di Labor y Asuntonan Social, un mocion cu mi persona a entrega na april ultimo a keda ehecuta. A base di e mocion aki personanan cu ta biba cerca nan mayornan y cu pa motibo di nan limitacion fisico y cu nan no por traha mas lo por haya ayudo social di awor en adelante.
Antes e grupo aki tawata haya solamente un miserabel 400 florin como ayudo social. Awe despues di mas cu 30 aña porfin a tene cuenta cu e grupo aki.
Mi a topa hopi di e tipo di casonan aki ora mi a bishita casnan y mi a haya esaki hopi inhusto. Tin casonan caminda un ciudadano a haya un derame cerebral y a keda invalido y no por traha ni funciona mas. E persona aki a perde tur cos y ta su mama a tum’e den cas pa yud’e. Y pasobra e mama tin un miserabel pensioen, e ser humano aki no por haya ayudo social. Awor lo bira cu si e persona aki bay cu un diagnostico di su dokter, e por haya ayudo social di 950 florin maske e ta biba cu un persona cu tin entrada.
Otro ehempel ta personanan cu a perde un parti di nan curpa y ta ser yama ‘gedeeltelijk blijvend invalide’. Nan ta haya 400 florin pero nan no por haya niun trabao. E grupo aki tambe lo conoce mehoracion. Mientras cu nan no haya un trabao y tur aña ta ser declara ‘gedeeltelijk blijvend invalide’, nan tambe lo haya 950 florin di ‘volledig blijvend invalide’. Nan lo mester acudi tur aña na Medwork y si nan no por haya trabao, nan tambe lo por haya e 950 florin di ‘volledig blijvend invalide’.
Cu e cambionan aki un grupo cu a ser margina y sigur discrimina pa mas cu 30 aña awo ta haya un lugar den maneho di Minister Glenbert Croes cu ta dirigi riba e ser humano. Mi a scoge pa haci lo maximo pa esaki bira realidad p’asina por acomoda e grupo aki cu pa añanan politiconan a engañanan solamente pa haya nan voto. Ami a hinca energia pa logra esaki pa asina corigi un inhusticia contra un grupo di persona cu a hayanan den un situacion cu nan no a pidi ni spera.