Home » Parlamentario drs. Shailiny Tromp-Lee: Preocupacionnan cu ta biba den e sector social y cu merece haya tur atencion

Parlamentario drs. Shailiny Tromp-Lee: Preocupacionnan cu ta biba den e sector social y cu merece haya tur atencion

by Admin
0 comment 55 views

Den e reunion publico di diamars ultimo tratando e presupuesto di Labor y Asuntonan Social, parlamentario Shailiny Tromp-Lee a cuminsa su disertacion elaborando riba e Centronan di Bario cu ta hunga un rol importante den e plan di gobierno pa duna e famia e atencion cu ta asina importante y pa crea un sociedad y comunidad fuerte cu norma y balornan bon ancra den nan fundeshi. Segun sra. Tromp-Lee, deseo di Gobierno ta pa e Centronan di Bario amplia nan programa anual cu algun actividad specifico. Sinembargo for di propio experencia como presidente di un Centro di Bario el a trece padilanti cu tin un scarcedad grandi na boluntario cu ta consciente cu e trabou enberdad ta boluntario pero no sin responsabilidad y compromiso. Ta p’esey sra. Tromp-Lee ta urgi minister Glenbert Croes pa evalua y apunta un activiteitenbegeleider pa e diferente Centronan di Bario.

 

Mas aleu pa loke ta e parti social sra. Tromp-Lee, a mustra su preocupacion pa varios otro asunto cu mester haya atencion:

  1. E cantidad di casonan registra na Bureau Sostenemi ta keda aumenta. Na 2018 a registra esun di mas halto desde cu nan a keda institui. Den total 390 caso te cu awor a keda registra. cual 77 a keda finalisa, 62 ta activo ainda y 160 ta ariba lista di espera. Mirando esaki tin e necesidad pa amplia e cantidad di trahadornan cu 6 persona te cu 9 persona. Espectativa ta cu lo bay logra elimina e lista di espera den 1 aña di tempo.

 

  1. Tin diferente grupo cu no ta of por haya e yudansa y cuido necesario, esta Muchanan no documenta y nan famia, Mucha, hoben y nos grandinan cu tin un limitacion leve pa motibo di nan IQ abou, Mucha/hoben y/of nan mayornan cu tin problema psychiatrico y Hobennan cu problema di adiccion. E parlamentario kier sa di minister con e ta bay percura pa a corto plazo e yudansa y cuido necesario pa e gruponan menciona keda ofreci door di e instancianan corespondiente. Tambe sra. Tromp-Lee kier a enfatisa riba e echo cu tin maneho cu actualmente ta contradeci otro y el a duna un ehempel specifico: un mucha no documenta actualmente tin e derecho na enseñansa, pero ora e maestro of e sociale werker na scol sa cu e tin un problema nan no por meld e mucha aki pa yudansa pasobra e ta ilegal. Pues como pais nos ta reconoce e mucha su derecho ariba enseñansa pero no ariba cuido of asistencia social/medico. Na Sociale Zaken nan ta yuda solamente persona cu un paspoort Hulandes pero nos tur ta consciente cu e problemanan social no ta conta solamente pa e Hulandes Arubiano cu ta biba na Aruba.

 

  1. Tin banda di 1000 mucha cu awendia ta bay scol sin un desayuno na stoma. Y si nan no a desayuna na cas hopi biaha nan no lo tin cuminda merdia tampoco. 1000 mucha ta un grupo grandi, un grupo cu nan perspectiva di bida, nan chens di ta exitoso den nan estudio etc. ta asina limita cu ta bira inaceptabel laga e situacion aki continua.

 

Finalmente pa loke ta trata asuntonan social sra. Tromp-Lee kier sa di minister con leu ta cu e revision di e maneho di bijstand caminda ta tene cuenta cu e problematica existente di personanan cu ta keda afgekeurd (100% of parcialmente) y cu ta biba cerca nan mayornan of un famia cu ta ricibi pensioen no ta bin na remarke pa haya bijstand. Esaki tin impacto grandi ariba e calidad di bida di nan directamente y mas cu claro ariba di esnan cu ken na ta biba.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio