Minister Glenbert Croes ta clausura aña cu un decision positivo y significativo cu lo trece alivio pa hopi hende demostrando cu accion cu e ser humano en berdad ta central den tur e decisionnan di Gabinete Wever-Croes.
Antes tabata e caso cu si un yiu mayor di edad cu no por traha of no por haya trabou, y ta biba cu su mayor(nan) cu ta pensiona, of cu welo(nan) cu ta haya penshun, e persona aki lo no por a bin na remarca pa un bijstand. Cu e cambio cu Minister Glenbert Croes a introduci awe 12 di december, awo porfin esaki ta bira posibel.
Mayoria di biaha e yiu of e nieto ta biba cu e grandinan pa diferente motibo: 1. vivienda ta caro 2. bida ta caro 3. ta biba cu e bieunan pa cuidanan pasobra 1. e bieunan no kier bay un cas di grandi 2. nan no por haya luga den cas di grandi 3. nan no por afford un cas di grandi.
Pues cu e decision aki cu Minister Glenbert Croes a introduci, nos ta cultiva e relacion di yiu cu ta cuida su grandinan. Nos ta cultiva locual cu tur estudio ta constata y conseha, cu pa felicidad y salud di nos grandinan ta miho pa nan ta den nan propio ambiente.
Gabinete Wever Croes ta demostra cada bes, den tur su decisionnan cu e ser humano ta central.
Minister Glenbert Croes ta sumamente satisfecho di por a introduci un cambio asina significante riba 12 di december na Parlamento di Aruba den beneficio di nos hendenan.