Oranjestad – E siman aki -durante un conferencia di prensa, Aruba Tourism Authority a firma un acuerdo entre SMAC y Stichting Musica pa entrega un suma di aporte pa e celebracion di nos Carnaval 65. E acuerdo a wordo firma den presencia y hunto cu representantenan di SMAC y Stichting Musica.
Aruba Tourism Authority ta reconoce e importancia di eventonan cultural riba nos isla y cu e organisadornan di e eventonan aki ta percura pa nos bishitantenan haya e oportunidad pa experiencia e diversidad di nos actividadnan cultural, pa asina engrandece e experiencia di nan bishita.
A.T.A. ta un di e sponsornan principal na nos Carnaval y ta consciente cu tin hopi spectativa pa e celebracion di 65 aña di e evento cultural aki.
Basa –entre otro- riba esaki, pa e di tres aña consecutivo, Aruba Tourism Authority ta un patrocinado na Stichting Maneho di Aruba su Carnaval (SMAC) y Stichting Musica.
Stichting Musica a ricibi 25 mil florin y SMAC a ricibi 100 mil florin cual hunto ta forma e suma corecto di 125 mil florin. Eroneamente, den algun medio di comunicacion a wordo publica cu esaki lo tawata 165 mil florin, cual ta incorecto.
E acuerdo di sponsorship a wordo firma cu e presidente di Stichting Maneho Aruba su Carnaval (SMAC), Shannon Henriquez, Edwina Werleman di Stichting Musica y CEO di A.T.A. Ronella Tjin Asjoe-Croes.
-FIN-