Home Politics Parlamentario Edgard Vrolijk (MEP): “Mi ta contento cu e ley di...

Parlamentario Edgard Vrolijk (MEP): “Mi ta contento cu e ley di fondo pa e plan di crisis social a pasa unanimamente den Parlamento”

 

 

Diamars ultimo nos a trata e ley di fondo destina pa ehecucion di e plan di crisis social. Na momento cu nos gobierno a drenta na november 2017, nan a bin encontra casonan doloroso cu nos niun no ta desea. Banda di esaki nos a encontra un grupo di profesional haciendo lo maximo pa trata na combati e tantisimo casonan tristo y sigur di muchanan cu ta pasando duro y ta core risico grandi.

Como un gobierno y un parlamento responsabel a aloca no menos cu 34 miyon florin den e fondo menciona cu ta destina pa yuda cu e crisis social. Lo enfoca riba 3 area cu ta 1. intervencion primario y ayudo tempran, 2. ayudo curativo y ayudo represivo y 3. cuido di personanan cu deficienca fisico.

Cu e plan aki lo percura pa traha preventivamente unda cu lo bin cu un mihor manera di registra y tambe control banda di lo bin cu programanan educacional pa comunidad. Instancianan lo ser suministra cu trahadornan profesional pa por atende cu problemanan y famianan cu mester guia y sigur lo brinda cuido na nos hendenan cu deficiencia fisico cu tambe ta sufri.

Mi ta contento cu parlamento den su totalidad a sostene e ley aki y ta wak e importancia di atende cu e crisis social cu sr. Mike Eman a causa e ultimo 8 añanan sin cu a duna importancia na esaki, pero sigur aki bo ta wak un madurez politico unda cu esnan cu a wak cu e maneho anterior di nan partido no a funciona y awe ta duna Minister Glenbert Croes e oportunidad di por lucha pa mehora e situacion social na Aruba.

Pa termina mi persona ta desea Minister Glenbert Croes hopi forsa y sigur e mihor deseonan na su persona pero tambe na tur actor cu lo hunga un rol hopi importante den ehecucion di e plan aki.