Home Politics MEP NA AVP: Ademas di ta un gran gañado, e ta...

MEP NA AVP: Ademas di ta un gran gañado, e ta un gran sinberguensa NA UN COMPANIA SO, MIKE EMAN A PAGA 141 MIL FLORIN PA CELEBRA SU COMPLEAÑOS

 

 

 

Mike Eman no solamente ta pasa pa historia como e gobernante mas gañado di Aruba, hincando pueblo di Aruba den un debe enorme sino ta comproba cu e ta pasa pa historia como e gobernante mas sinberguensa cu Aruba a conoce.

 

Mientras cu Eman ta bati na su pecho cu e ta bay paga e debe di pais Aruba cu e y su gabinete a redobla, Eman ta engrandece e debe mas cu celebracion di su fecha natal na e brug di Green Coridor na Spaans Lagoen. Un fiesta cu a costa pueblo por lo menos 300 mil florin. Awo solamente un cobransa a sali di 141 miyon florin. Ainda falta otronan cu ainda mester sali, cua lo no cay di sorpresa tampoco mirando e cantidad di pagonan barbaro cu e gobierno di AVP a haci durante 8 aña na nan amigonan y famianan y den algun caso hasta na amantenan.

 

Un gastamento di placa na conferencianan berde cu den 8 aña no a trece fruta pa Aruba probecha di dje. Eman solamente a biaha cu placa di pueblo pa asisti na e conferencianan aki y a organisa e conferencianan aki pa asina pone su mes un nomber briya sin trece resultadonan positivo for di e conferencianan aki.

 

Y awo, pueblo a haya e recibo di Mike Eman su fiesta personal pasobra Mike Eman no tin caracter pa festeha su fecha natal bou di su mesun costo manera ta normal pa cualkier persona drechi haci.

 

Partido MEP ta admira cu su lider, señora Evelyn Wever-Croes a celebra su fecha natal sin uza recurso financiero di Gobierno y sinembargo bou di su mesun gasto, a festeha cu publico su fecha natal. Esaki ta un muestra di integridad door di no uza placa di pueblo pa cosnan personal.

 

Pa MEP semper integridad ta un prioridad. Esaki nos ta wak den tanto Parlamento como tambe den nos Gobierno actual. Mientras Gobierno ta trahando duro pa baha nos debe nacional, pueblo por ta sigur cu hamas pueblo lo paga pa fiestanan personal di ningun mandatario di e Gobierno aki.