Home Politics Lo firma MoU di Fast Ferry dia 21 di December proximo

Lo firma MoU di Fast Ferry dia 21 di December proximo

Durante tratamento di Presupuesto Supletorio 2018, Minister Chris Romero a haya algun pregunta pa cu e desaroyo di e Proyecto Fast Ferry.

Manera ta conoci, Minister Romero ta impulsando pa e Proyecto di Fast Ferry bira un realidad, cual lo nifica un manera mas economic di trafico entre Aruba y Corsou, inicialmente. Esaki lo traduci den un aumento positivo di turismo pa y di nos pais, cual lo crea un entrada economic extra pa Aruba.

 

Por corda cu den luna di augustus di e aña aki, durante un reunion entre Gabinete Rhuggenaath y Gabinete Wever-Croes cu a tuma luga na Corsou, a acorda cu lo firma un MoU (Memorandum of Understanding) unda cu ambos pais ta expresa e intencion di desaroya e Proyecto Fast Ferry entre Aruba y Corsou. Dicho palabracion a keda ratifica den Conseho di Minister tanto di Gobierno di Aruba y Corsou.

 

Recientemente, durante su desertacion na Parlamento di Aruba, Minister Chris Romero a anuncia cu e firma di e MoU entre Aruba y Corsou pa manifesta e intencion di e desaroyo di e Proyecto Fast Ferry, lo tuma luga dia 21 di December benidero. Pa cu esaki, Minister Steven Martina di Corsou lo bin Aruba y asina ta pasa pa e siguiente fase di e Proyecto Fast Ferry.

 

E siguiente paso lo ta pa cada Gobierno instala un comision multidisciplinario cu lo atende cu e diferente trabounan di preparacion relaciona cu e Proyecto Fast Ferry. Den un futuro, y ora cu e proyecto yega na un fase mas avansa, lo instala tambe un comision mixto di Aruba y Corsou.

 

 

Minister Romero a expresa di ta hopi complaci pa mira cu tur cos ta canando positivamente pa cu e Proyecto di e Fast Ferry entre Aruba y Corsou.