Home Politics 1 aña despues pueblo mester paga pa celebracion di cumpleaños di Mike...

1 aña despues pueblo mester paga pa celebracion di cumpleaños di Mike Eman

Durante tratamento di presupuesto supletorio 2018 den reunion publico den Parlamento, lider di fraccion di POR, Marisol Lopez-Tromp a indica cu e aña aki e ministernan a haci nan best pa keda budget neutral, cual ta algo hopi bon, ya cu mayoria di bes cu ta atende cu presupuesto supletorio ta trata cu a surpasa e presupuesto grandemente, bayendo den miyonnan.

Na mes momento el a cuestiona e sistema actual di control pa loke ta ehecusion di proyectonan y inversionnan. Lopez-Tromp a trece e punto aki pasobra nos isla no lo ta den e situacion den cual nos a awe pa loke ta placanan cu a wordo surpasa unda cu ministernan di un of otro forma, inclusive den e sistema di control cu nos tin, den añanan cu a pasa, a uza fondonan di pueblo pero ningun departamento a haya pa wak su decreto ministerial of su decision riba placa di pueblo cu tin cu core den un procedura normal, manera entre otro bay departamentonan pa haya conseho di finansas, pa haya aprobacion di parti finansas, si tin e placa pe, si tin espacio pe riba e presupuesto.

Poniendo enfasis riba esaki, el a presenta un caso cu a tuma lugar na 2017 y na mes momento a puntra Gobierno con por evita cu algo asina sosode atrobe. Ta trata aki di un caso hopi cuestionabel unda cu a celebra hacimento di aña di un Prome Minister bou capa di un pre inauguracion di un brug. Mientras tanto e tempo ey a tira santo den wowo di pueblo bisando cu e compania cu a traha e brug ta esun cu lo carga e gastonan di e celebracion.  Awo, bou un otro gobernacion y un aña despues un factura a bin dilanti di riba 140 mil Florin cu no e compania mester paga, sino pueblo!

“Bo ta wak un Decreto Ministerial firma 6 di october 2017, despues di eleccion, firma pa e Minister di Ruimtelijke Ontwikkeling, Infrastructuur en Milieu. El a hacie den acuerdo cu Minister di Financien en Overheidsorganisaties di e tempo ey. Ta trata di un factura y e ta bisa den e decreto pa paga un compania cu a suminstra un servicio. Mi ta citeer loke e ta bisa: ‘Overwegende –dat de Green Corridor van Oranjestad na San Nicolas in de laatste fase is van uitvoering zodat het project binnen enige maanden kan worden opgeleverd.’ Dus e proyecto no ta cla. E decreto ta sigui bisa ‘dat de nieuwe brug van de Green Corridor bij de Spaans Lagoen is afgebouwd en is tevens toegankelijk gesteld aan het publiek’. Es decir, sin cu e ta gekeurd pa siguridad. Continuando, ‘dat voor het toegankelijk stellen van de nieuwe Spaan Lagoen brug de regering van het Kabinet Mike Eman I het besluit heeft genoemen om op 1 september 2017 een pre-inauguratie van de nieuwe brug te laten organiseren’. Esey kiermen cu e no ta un inauguracion oficial cu aprobacion di departamentonan di gobierno, e ta un pre-inauguracion cual ta significa cu probablemente bo no tin aprobacion di e departamentonan en cuestion di Infrastructura. Ademas e decreto ta papia di 1 di september y e ta firma 6 di october. Mas aleu e decreto ta papia di e grupo Home Entertainment Group N.V.  High Performance Sound cu ta bay pa musica y nan ta cobrando un suma den e caso aki, un di e facturanan, 141.811,20 Florin. Minister ta pidi ‘dat is afgezien van het houden van een onderhandse aanbesteding gezien de urgentie en specialisme dat de werkzaamheden inhoudt’. E minister ta pidi pa desvia for di e proceduranan normal y ta dicidi ‘om aft e zien van het houden van een onderhandse aanbesteding voor het verrichten van het organiseren van de pre-inauguratie activiteiten van de nieuwe brug van de Spaans Lagoen. Dan het organiseren van de pre-inauguratie van de niewe brug bij de Spaans Lagoen voor Land Aruba is gegund’ ‘na un compania pa e suma di 141 mil Florin ya ta bisa ‘te bepalen dat de kostenvoortvloeinde uit de te verrichte werkzaamheden bekostigdworden middles de begrotingspost no 161200001.4362 Overige uitbestedingen, van de begroting van het Ministerie van Ruimtelijke Ontwikkeling, Infrastructuur en Integratie’. Berdad bo ta wak un begrotinspost, pero ta papiando di 1 di september di un fiesta cu a tuma lugar riba brug sin cu e brug ta aproba, sin cu e brug ta cla, pero e ta firma 6 di october door di e minister. Tin diferente aspecto no solamente di procedura di fecha, pero tambe mi ta puntra mi mes si e fiesta cu a wordo teni, si ta un cumpleaños mes a wordo celebra, eigenlijk esaki no mag cay pa Land paga. Esey ta mi punto”, Marisol Lopez-Tromp a bisa enfaticamente.

El a continua bisando “pa ken cu ta, e ta algo cu sea bo mes ta hacie, bo partido por hacie, bo fundraising ta regle, pero no por ta cu Land, pueblo ta paga pa esaki anto pa colmo cu terugwerkende kracht. Esaki ta un ehempel di e tantisimonan cu tin.”

“Mi pregunta na Gobierno ta: con bo por evita den e sistema di aparato gubernamental cu nos tin cu cosnan asina sosode y cu despues esun cu bon tin cu atende cune. E minister cu bin despues ta wordo presenta esaki anto pa colmo ora e bay check, ningun di e departamentonan tine, e no ta registra, e no tin fecha, e no tin number. Financien mes, segunmi nunca a wake, departamento di DOW tampoco sa di dje. E pregunta ta: e proceduranan cu nos tin den nos sistema, con por percura cu esakinan ta cana segun ley?”, lider di Fraccion di POR a puntra.

El a presenta e punto akinan pasobra e ta kere cu e suma aki y kisas mucho mas di nan a wordo haci sin cu e meta pa cual e ta wordo haci ta wordo controla of por wordo controla. Esencial pa Marisol Lopez-Tromp no ta si e compania aki a traha of no, e ta imagina su mes cu e la haci e trabou. Esencial pe ta con por ta cu den un tempo manera esaki cu tur cos ta transparente y habri, ministernan, y den e caso aki un Prome Minister y un Minister di Infrastructura, por haci algo asina di uza placa di pueblo pa algo cu eigenlijk bo no por cobra pueblo pe, e ta algo mas bien priva, politico, di e partido, di e persona. “Awo pueblo tin cu bay paga pa tipo di cosnan asina?” Lopez-Tromp a finalisa.