Home Politics Mike de Meza: Cacho cu nenga weso, ta weso mes e tin...

Mike de Meza: Cacho cu nenga weso, ta weso mes e tin cu come

MEP a brasa hedging awe na WEB cu dos man!

ORANJESTAD, Aruba: “Manera nos bieunan semper a bisa: Cacho cu nenga weso, ta weso mes e tin cu come. Esey ta mi prome reaccion despues di tuma nota cu e Gobierno aki lo hedge e prijs di combustibel pa WEB Aruba NV”, asina Ing. Mike de Meza, miembro di Parlamento di Partido AVP a duna di conoce net prome cu e reunion di Parlamento di a inicia dialuna mainta. E ta haya masha particular, cu tur locual MEP a critica den pasado, e demonisa hedging, awor ta haci mesun cos.

 

E ex Minister di Asuntonan di Energia ta corda ainda cu durante e ultimo 8 añanan, a sinta na varios ocasion cu directiva di Utilities Aruba NV y WEB Aruba NV relaciona cu e tarifanan di Heavy Fuel Oil cu ta paga pa por produci awa y coriente. Tur conseho tabata pa “Hedge” pasobra e prijsnan no ta stabiel. Es mas, e tata di hedging na Aruba ta e mesun Nel Oduber, cu ta e prome Gobierno cu a cuminsa hedge na WEB.

 

Por corda ainda cu MEP den oposicion a anuncia cu nan lo investiga e proceso di hedging, pasobra nan a insinua cu tabatin hende cu sigur a gana placa di esaki. Awor cu nan mes ta hedge na WEB, e pregunta ta, mester investiga? Ken lo investiga? Awor si no a cobra placa bou man? Cu e ultimo desaroyonan aki, Parlamentario Mike de Meza ta haya cu MEP a demostra cu nan no a cambia….campaña ta un cos y goberna ta full un otro cos. Mesun cos a bisa di lo investiga e contract di CITGO, pero te ainda nada.

 

E gobierno aki sa masha bon cu AVP a haci un bon trabou y cu tur cos ta masha bon. Nan problema ta cu nan a critica tur e trabounan y proyectonan aki y awor ta haya nan ta guli nan mesun palabranan bek. Si bo wak bon, tur nan proyectonan awor ta procedente di AVP, nan a djis sigui y termina cu proyectonan andando caba.